जयपूर.राजस्थानमध्ये नव्या मुख्यमंत्र्यांच्या निवडीसाठी ( Next CM of Rajasthan ) बोलावलेल्या काँग्रेस विधीमंडळ पक्षाच्या बैठकीपूर्वीच काँग्रेसमध्ये गोंधळ उडाला आहे. मुख्यमंत्री अशोक गेहलोत कॅम्पचे आमदार, मंत्री शांती धारिवाल यांच्या निवासस्थानी जमले आहेत. ते सभापती सीपी जोशी यांच्याकडे राजीनामा देणार आहेत.
शांती धारीवाल यांच्या निवासस्थानीउपस्थित असलेल्या आमदारांनी 'हम सब एक हैं'चा नारा देत काँग्रेस विधिमंडळ पक्षाच्या बैठकीला उपस्थित राहण्यास स्पष्टपणे नकार दिला आहे. सूत्रांनी दिलेल्या माहितीनुसार, शांती धारिवाल यांच्या निवासस्थानी उपस्थित असलेले जवळपास 92 आमदार सभापती सीपी जोशी यांच्याकडे राजीनामा देणार आहेत. शांती धारीवालही आमदारकी सोडण्याच्या तयारीत आहेत.
खाचरियावासियांचे मोठे वक्तव्य : गेहलोत सरकारमधील अन्नमंत्री प्रताप सिंह खाचरियावास म्हणाले की, सर्व आमदार संतापले आहेत. त्यामुळेच आम्ही विधानसभा अध्यक्षांकडे राजीनामा द्यायला जात आहोत. जेव्हा सरकार संकटात होते, त्यावेळी सर्वांनी सरकारला साथ दिली. मात्र, आता आमदारांचे म्हणणे ऐकून घेतले जात नाही. त्यामुळे आमदार संतापले आहेत. शांती धारीवाल यांच्या बंगल्यातून सर्व आमदार निघाले आहेत. प्रताप सिंह म्हणाले की, विधानसभेच्या अध्यक्षांकडे 92 आमदार राजीनामा देणार आहेत. काही वेळात त्यांची संख्या 100 च्या पुढे जाईल.
विधानसभा अध्यक्ष सीपी जोशी यांच्या निवासस्थानी जाणार : आदल्या दिवशी धारीवाल यांच्या निवासस्थानी जमलेल्या गेहलोत छावणीच्या आमदारांनी सचिन पायलटच यांना मुख्यमंत्री म्हणून स्वीकारणार नसल्याचे स्पष्ट केले होते. गेहलोत छावणीतील आमदार आणि मंत्र्यांमध्ये सरकार वाचवणाऱ्या 102 आमदारांपैकी कुणालाही मुख्यमंत्री करायचे असा करार झाला होता. मात्र मानेसरला जाणाऱ्या आमदारांना ते मान्य नाही.
