Budgam Baby Exchange: हॉस्पिटलने मुलाऐवजी दिला मुलीचा मृतदेह? पोलीस आता करणार डीएनए चाचणी

शनिवारी बडगामच्या पाटलीबाग भागातील एका महिलेने जेव्हीसी हॉस्पिटलवर आरोप केला की, उपचारादरम्यान मृत्यू झालेल्या बाळाऐवजी हॉस्पिटलने तिला मुलीचा मृतदेह दिला. (budgam baby exchange controversy).

बडगाम (जम्मू आणि काश्मीर) -बडगामच्या पाटलीबाग भागातील एका कुटुंबाला SKIMS रुग्णालयात ३ नोव्हेंबरला मुलगा झाला. मात्र नवजात बाळाची प्रकृती चिंताजनक असल्याने त्याला अतिदक्षता विभागात ठेवावे लागले. मात्र, 13 दिवसांनी उपचारादरम्यान मुलाचा मृत्यू झाला. त्यानंतर रुग्णालय प्रशासनाने मुलाचा मृतदेह कुटुंबीयांच्या ताब्यात दिला. (budgam baby exchange controversy). कुटुंबीयांच्या म्हणण्यानुसार, त्यांनी मुलाचा मृतदेह त्यांच्या मूळ गावी नेला असता, आंघोळ घालताना मुलाऐवजी मुलीचा मृतदेह आढळल्याने त्यांना धक्काच बसला. कुटुंबीयांनी मुलीवर अंत्यसंस्कार केले आणि नंतर रुग्णालयात परतले.

मृतदेह डीएनएसाठी बाहेर काढला -या घटनेविरोधात कुटुंबीयांनी रुग्णालयात निदर्शने केली. कुटुंबीयांच्या म्हणण्यानुसार, रुग्णालयाने जारी केलेल्या लेखी कागदपत्रांमध्ये त्यांना मुलगा झाल्याचे म्हटले आहे. वाद वाढत असताना रुग्णालयाच्या वैद्यकीय अधीक्षक डॉ. शफा देवा यांनी सांगितले की, रुखसाना नावाच्या महिलेला ३ नोव्हेंबर रोजी रुग्णालयात दाखल करण्यात आले. त्यांनी सांगितले की, तिच्यावर वरिष्ठ सर्जनने उपचार केले आणि महिलेने पेरी-नेटल श्वासोच्छवासाने ग्रस्त असलेल्या एका मुलीला जन्म दिला. वैद्यकीय अधीक्षकांनी सांगितले की कुटुंबाने एमआरडीमध्ये मुलगा झाल्याची नोंद केली. दवाखान्यात नाही. कुटुंबाच्या आरोपानंतर अधिकाऱ्यांनी डीएनए चाचणीसाठी मृतदेह बाहेर काढण्याचा निर्णय घेतला, ज्यामुळे मुलीचे खरे पालकत्व उघड होईल. आरोग्य विभागाच्या फॉरेन्सिक टीमने आज मुलीचा मृतदेह डीएनए सॅम्पलिंगसाठी बाहेर काढला, त्यानंतर नमुने दिल्लीला पाठवण्यात आले.