इंफाळ :मणिपूरमध्ये गेल्या 24 तासात कोणतीही हिंसाचाराची घटना झालेली नाही. मात्र परिस्थिती तणावपूर्ण असल्याची माहिती मणिपूर पोलिसांनी दिली आहे. सोमवारपासून राष्ट्रीय महामार्ग 37 (ए) वर मालवाहू वाहनांची वाहतूक सुरू झाल्याचेही पोलिसांनी सांगितले. पोलिसांनी दिलेल्या माहितीनुसार, बहुतांश जिल्ह्यांमध्ये जनजीवन पूर्वपदावर आले आहे. राज्य पोलीस आणि केंद्रीय सुरक्षा दल राज्यात सतत गस्त, फ्लॅग मार्च आणि शोध मोहीम राबवत आहेत. विशेषत: डोंगरी आणि खोऱ्यातील दोन्ही जिल्ह्यांतील दुर्गम भागात शोधमोहीम सुरू असल्याची माहितीही पोलिसांनी दिली आहे.
सीमावर्ती भागात राबवली शोधमोहीम :गेल्या 24 तासात पोलीस आणि केंद्रीय सुरक्षा दलांनी इंफाळ पश्चिम, काकचिंग, कांगपोकपी आणि चुराचंदपूर जिल्ह्यांच्या सीमावर्ती भागात शोधमोहीम राबवली आहे. मणिपूरच्या विविध जिल्ह्यांमध्ये सुमारे 110 ठिकाणी तपासणी नाके उभारण्यात आले आहेत. कोणतीही अनुचित घटना टाळण्यासाठी सुरक्षा दलांचे जवान डोळ्यात तेल घालून पहारा देत आहेत. राज्यातील विविध जिल्ह्य़ांमध्ये संचारबंदीच्या काळात निर्माण झालेल्या अप्रिय परिस्थितीमुळे पोलिसांनी विशेषतः डोंगरी आणि खोऱ्यातील 185 जणांना ताब्यात घेतले आहे. दुसरीकडे राष्ट्रीय महामार्ग 37 वरून जीवनावश्यक वस्तूंची वाहतूक सुरक्षितपणे सुरू आहे. मंगळवारी जिरीबाम येथून एकूण 300 आणि नोनी येथून 356 वाहने माल घेऊन राजधानी इंफाळकडे रवाना झाली.