डेहराडून- पंतप्रधान नरेंद्र मोदी हे आज (१२ ऑक्टोबर) उत्तराखंडमधील मानस खंड येथील प्रसिद्ध कुमाऊं मंडलला पोहोचले. कुमाऊं मंडलमधील पिथौरागड जिल्ह्यात पंतप्रधान नरेंद्र मोदी यांनी आदि कैलाशचे दर्शन घेतले. आदि कैलाश येथील पार्वती कुंडमध्ये पंतप्रधानांनी पुजादेखील केली.
- पंतप्रधान नरेंद्र मोदी हे आज सकाळी साडेआठ वाजता पिथौरागढ येथे पोहोचले. सर्वप्रथम पंतप्रधानांनी प्रसिद्ध आदि कैलाश येथे दर्शन घेतले. पंतप्रधान येण्यापूर्वी रस्ते मार्गावर सुशोभीकरण करण्यात आले. मार्गाच्या दोन्ही बाजुला फुलांची सजावट करण्यात आली. मार्गातील फुलांची सजावट पाहत मोदी हे दर्शन घेण्यासाठी पोहोचले.
पंतप्रधान मोदींनी कैलाश मंदिरात घेतले दर्शन- पंतप्रधान यांनी भक्तीभावानं कैलाशाचे दर्शन घेतले. त्यांनी हात जोडत मंत्र जप केला. त्यानंतर दोन्ही हात उंचावत हर हर महादेवचा जयघोष केला. पंतप्रधान मोदींनी पार्वती तालजवळ ध्यान केले. त्यांच स्थानिक लोकांनी जोरदार स्वागत केलं. मोदींनी पारंपारिक पोषाख घातल्याचं दिसून आलं. अल्मोडा येथील प्रसिद्ध मंदिर जागेश्वर धाम येथेदेखील पूजा केली. जोगेश्वर मंदिरात भोलेनाथाची पूजा करून आशिर्वाद घेतला. यावेळी पंतप्रधान ११ ब्राम्हणांचे यजमान झाले. स्थानिक पर्यटनाला प्रोत्साहन देण्यासाठी पंतप्रधान मोदींचा हा दौरा महत्त्वपूर्ण आहे.