हैदराबाद :पंतप्रधान नरेंद्र मोदी यांनी रविवारी सिकंदराबाद ते विशाखापट्टणम दरम्यान धावणाऱ्या वंदे भारत एक्सप्रेस ट्रेनला हिरवा झेंडा दाखवला. पंतप्रधान मोदींनी व्हिडिओ कॉन्फरन्सिंगद्वारे ही रेल्वे सेवा देशाला समर्पित केली.
वंदे भारत एक्स्प्रेसचा भाविक आणि पर्यटकांना फायदा : यावेळी पंतप्रधान म्हणाले, 'आज या उत्सवाच्या वातावरणात तेलंगणा आणि आंध्र प्रदेशला एक भव्य भेट मिळत आहे. मी या ट्रेनसाठी दोन्ही राज्यातील जनतेचे अभिनंदन करतो. आज आर्मी डे देखील आहे. देशातील प्रत्येक नागरिकाला आपल्या सैन्याचा अभिमान आहे. यावेळी पोंगल, माघ बिहू, मकर संक्रांती, उत्तरायण हे सणही उत्साहात साजरे केले जातात. ते म्हणाले, वंदे भारत एक्स्प्रेसचा भाविक आणि पर्यटकांना मोठा फायदा होणार आहे. सिकंदराबाद ते विशाखापट्टणम दरम्यानचा प्रवासाचा वेळही या ट्रेनमुळे कमी होणार आहे. एक प्रकारे ही ट्रेन तेलंगणा आणि आंध्र प्रदेशची सामायिक संस्कृती आणि वारसा जोडणार आहे. वंदे भारत ट्रेनची आणखी एक खासियत आहे. ही ट्रेन नवीन भारताच्या संकल्पाचे आणि क्षमतेचे प्रतीक आहे. वेगवान बदलाच्या मार्गावर असलेल्या भारताचे ते प्रतीक आहे. असा भारत जो आपल्या स्वप्नांबद्दल आणि आकांक्षांसाठी अधीर आहे. एक भारत ज्याला वेगाने वाटचाल करून आपले ध्येय गाठायचे आहे.
संपूर्ण स्वदेशी बनावटीची ट्रेन : ही ट्रेन भारतीय रेल्वेने सुरू केलेली आठवी वंदे भारत एक्सप्रेस आहे. पंतप्रधान कार्यालयाने शुक्रवारी एका निवेदनात ही माहिती दिली. ही ट्रेन तेलंगणा आणि आंध्र प्रदेश या दोन तेलुगू भाषिक राज्यांना जोडणारी पहिली ट्रेन असेल, जी सुमारे 700 किमी अंतर कापणार आहे. ही ट्रेन आंध्र प्रदेशातील विशाखापट्टणम, राजमुंद्री विजयवाडा तर तेलंगणातील खम्मम, वारंगल आणि सिकंदराबाद स्थानकावर थांबेल. ही स्वदेशी बनावटीची ही ट्रेन अत्याधुनिक प्रवासी सुविधांनी सुसज्ज आहे जी वापरकर्त्यांना जलद, आरामदायी आणि सोयीस्कर प्रवासाचा अनुभव देईल.
वर्षाच्या अखेरीस तेलंगणात निवडणूका : पहिली वंदे भारत एक्सप्रेस ट्रेन १५ फेब्रुवारी २०१९ रोजी नवी दिल्ली-कानपूर-अलाहाबाद-वाराणसी मार्गावर रवाना झाली होती. गेल्या वर्षी डिसेंबर महिन्यात, पंतप्रधानांनी पश्चिम बंगालमधील हावडा ते न्यू जलपाईगुडी या नवीन वंदे भारत एक्सप्रेस ट्रेनला हिरवा झेंडा दाखवला होता. ही ट्रेन वंदे भारत मालिकेतील सातवी ट्रेन होती. या वर्षाच्या अखेरीस राज्यात निवडणुका होणार असल्याने तेलंगणामध्ये या ट्रेनच्या लॉन्चिंगला महत्त्व आहे.
हेही वाचा :Vande Bharat Train: पंतप्रधान नरेंद्र मोदी यांनी नागपूर ते बिलासपूर दरम्यान वंदे भारत एक्सप्रेस ट्रेनला दाखविला हिरवा झेंडा
