Odisha Train Accident : बालासोर रेल्वे अपघात प्रकरणी सीबीआयची मोठी कारवाई, तीन रेल्वे कर्मचाऱ्यांना अटक

ओडिशातील बालासोर रेल्वे अपघातप्रकरणी सीबीआयने तीन रेल्वे कर्मचाऱ्यांना अटक केली आहे. 2 जून रोजी बालासोर जिल्ह्यातील बहनगा बाजार स्टेशनजवळ झालेल्या भीषण अपघातात 293 लोकांचा मृत्यू झाला होता. तर 1,000 हून अधिक लोक जखमी झाले होते.

नवी दिल्ली :बालासोर रेल्वे अपघातप्रकरणी सीबीआयने शुक्रवारी तीन रेल्वे कर्मचाऱ्यांना अटक केली आहे. ही या प्रकरणातील पहिली अटक आहे. याबाबत माहिती देताना अधिकाऱ्यांनी सांगितले की, सीबीआयने बालासोर जिल्ह्यात तैनात वरिष्ठ विभाग अभियंता (सिग्नल) अरुण कुमार मोहंता, विभाग अभियंता मोहम्मद अमीर खान आणि तंत्रज्ञ पप्पू कुमार यांना पुरावे नष्ट करणे आणि नकळत हत्या करणे या कलमांखाली अटक केली आहे.

अपघातात 293 लोकांचा मृत्यू : 2 जून रोजी ओडिशातील बालासोर जिल्ह्यातील बहनगा बाजार स्टेशनजवळ भीषण रेल्वे अपघात झाला होता. या अपघातात 293 लोकांचा मृत्यू झाला होता तर 1,000 हून अधिक लोक जखमी झाले होते. शालीमार - चेन्नई कोरोमंडल एक्स्प्रेस, बेंगळुरू - हावडा सुपरफास्ट एक्स्प्रेस आणि मालगाडी या तीन रेल्वे गाड्यांची एकमेकांना घडक झाली होती.

चुकीच्या सिग्नलिंगमुळे अपघात झाला : यापूर्वी या रेल्वे अपघाताच्या चौकशीसाठी स्थापन करण्यात आलेल्या उच्चस्तरीय समितीने अपघाताचे मुख्य कारण चुकीचे सिग्नलिंग असल्याचे म्हटले आहे. या समितीने सिग्नलिंग अँड टेलिकम्युनिकेशन (एस अँड टी) विभागातील अनेक त्रुटी अधोरेखित केल्या होत्या. पूर्वीच्या इशाऱ्यांचे पालन केले असते, तर दुर्घटना टाळता आली असती, असेही समितीने सूचित केले.

..तर अपघात टाळता आला असता : अहवालात असेही नमूद केले आहे की, बहनगा बाजार स्थानकावरील लेव्हल क्रॉसिंग गेट 94 वर इलेक्ट्रिक लिफ्टिंग बॅरियर बदलण्याच्या कामासाठी स्टेशन-विशिष्ट मंजूर सर्किट आकृतीचा पुरवठा न करणे ही चूक होती. ज्यामुळे चुकीचे वायरिंग झाले. अहवालानुसार, फील्ड पर्यवेक्षकांच्या टीमने वायरिंग डायग्राममध्ये बदल केले आणि त्याची प्रतिकृती तयार करण्यात अयशस्वी झाले. अहवालात असेही नमूद आहे की, 16 मे 2022 रोजी दक्षिण पूर्व रेल्वेच्या खरगपूर विभागातील बनकर्नायबाज स्टेशनवर चुकीच्या वायरिंग आणि केबल बिघाडामुळे अशीच घटना घडली होती. या घटनेनंतर चुकीच्या वायरिंगची समस्या सोडवण्यासाठी योग्य पावले उचलली गेली असती तर बहनगा मार्केटमधील दुर्घटना घडली नसती.

हेही वाचा :