भारताचं 'सर्वात तरुण' कॅबिनेट, केंद्रीय मंत्रिमंडळाचा आज विस्तार; महाराष्ट्रातून कोणाला मिळणार मंत्रिपद?

नव्या मंत्रीमंडळात तरुण चेहऱ्यांना संधी देण्यात येणार असल्याची माहिती आहे. भारताच्या आतापर्यंतच्या इतिहासामधील सर्वांत तरुण नेत्यांचा समावेश असलेले हे कॅबिनेट असणार आहे. नेत्यांचे सरासरी वय सर्वात कमी आणि शैक्षणिक पात्रता सर्वाधिक जास्त असेल, अशी माहिती आहे. यात पीएचडी, एमबीए, पोस्ट ग्रॅज्युएट नेत्यांचा समावेश असणार आहे.

नवी दिल्ली - केंद्रीय मंत्रिमंडळाचा विस्तार बुधवारी संध्याकाळी सहा वाजता करण्यात येणार आहेत. नव्या मंत्रीमंडळात तरुण चेहऱ्यांना संधी देण्यात येणार असल्याची माहिती आहे. भारताच्या आतापर्यंतच्या इतिहासामधील सर्वांत तरुण नेत्यांचा समावेश असलेले हे कॅबिनेट असणार आहे. नेत्यांचे सरासरी वय सर्वात कमी आणि शैक्षणिक पात्रता सर्वाधिक जास्त असेल, अशी माहिती आहे. यात पीएचडी, एमबीए, पोस्ट ग्रॅज्युएट नेत्यांचा समावेश असणार आहे.

केंद्रीय मंत्रिमंडळाच्या विस्तारात भाजपामधील नेत्यांसह एनडीएच्या मित्र पक्षांनाही स्थान मिळणार असल्याचं सांगितलं जात आहे. चर्चेत असलेले बरेच नेते दिल्लीत दाखल झाले आहेत. यामध्ये ज्योतिरादित्य सिंधिया, सर्बानंद सोनोवाल, पशुपती पारस, नारायण राणे आणि वरुण गांधी यांचा समावेश आहे.

केंद्रीय मंत्रिमंडळाचा विस्तार पावसाळी अधिवेशन आगोदर करण्यात येत आहे. देशांमध्ये असलेल्या कोरोना परिस्थितीमुळे केंद्रीय मंत्रिमंडळ विस्तार हा थांबवण्यात आला होता. पंतप्रधान नरेंद्र मोदी 2019 मध्ये दुसऱ्यांदा सत्तेत आले. मात्र, दुसऱ्या टर्ममध्ये त्यांनी एकदाही मंत्रिमंडळाचा विस्तार केलेला नाही. आज मंत्रिमंडळाचा विस्तार होणार आहे. केंद्रीय मंत्रिमंडळाचा हा विस्तार पुढच्या वर्षी होणाऱ्या 5 राज्यांच्या विधानसभा निवडणुका डोळ्यासमोर ठेवून केला जात असल्याचं बोललं जात आहे

दिल्लीकडे उड्डाण घेण्यापूर्वी ज्योतिरादित्य सिंधिया यांनी उज्जैनमधील प्रसिद्ध महाकाळ मंदिरात पूजा केली. सिंधिया गेल्या वर्षी काँग्रेस सोडून भाजपामध्ये दाखल झाले होते. सिंधियांच्या भाजपा प्रवेशानंतर मध्यप्रदेशात पुन्हा एकदा भाजपाचे सरकार सत्तेवर आले. यात ज्योतिरादित्य यांचे मोठे योगदान राहिले होते. त्यामुळे त्यांची वर्णी लागण्याची शक्यता आहे. तर प्रदिर्घकाळ शिवसैनिक आणि शिवसेनेच्या पहिल्या मंत्रिमंडळात मंत्री आणि नंतर मुख्यमंत्री राहिलेले नाराणय राणे यांना शिवसेनेचे अनेक बारकावे माहीत आहेत. त्यामुळे शिवसेनेवर प्रहार करण्यासाठी भाजप राणेंना मंत्रीपदाचे बळ देण्याची शक्यता आहे.

केंद्र सरकारने मंगळवारी मोठा फेरबदल करत 8 राज्यांमध्ये नविन राज्यपालांची नेमणूक केली आहे. केंद्रीय सामाजिक न्यायमंत्री थावरचंद गहलोत यांना कर्नाटकचा राज्यपालपदी नियुक्त करण्यात आले आहे. यामुळे त्यांचे मंत्रिमंडळातील स्थान रिक्त झाले आहे. या परिस्थितीत अशा व्यक्तीचा मंत्रिमंडळात समावेश होऊ शकतो. जो संसदेच्या कोणत्याही सभागृहाच सदस्य नाही. गहलोत यांच्या उर्वरित कार्यकाळात त्याला राज्यसभेवर पाठवले जाऊ शकते.

हेही वाचा -विधानसभा-मुंबई महापालिका समोर ठेवून नारायण राणेंची केंद्रात वर्णी लागण्याची दाट शक्यता