नवी दिल्ली :देशाचा कारभार पाहणारी वास्तू म्हणून संसद भवनाकडे पाहिले जाते. देशाच्या नवीन संसद भवनाचे बांधकाम जवळपास पूर्ण झाले असून आता फक्त संसद भवनाच्या उद्घाटनाची औपचारिक घोषणा होणे बाकी असल्याची माहिती सीपीडब्ल्यूडीच्या सूत्रांनी ईटीव्ही भारतला दिली आहे. केंद्र सरकार या महिन्याच्या अखेरीस (मे 2023) नवीन संसद भवनाचे उद्घाटन करण्याची शक्यता आहे. केंद्रीय सार्वजनिक बांधकाम विभागाने (CPWD) नुकतीच 14 लाख रुपयांच्या फुलांची सजावटीसाठी निविदा काढल्याची माहिती सूत्रांनी दिली आहे.
पंतप्रधानांनी केली होती पाहणी :पंतप्रधान नरेंद्र मोदी इतर मान्यवरांच्या उपस्थितीत संसदेच्या नवीन इमारतीचे उद्घाटन करणार असल्याची माहिती सार्वजनिक बांधकाम विभागाच्या अधिकाऱ्याने दिली. मार्चमध्ये पंतप्रधान मोदींनी लोकसभा आणि राज्यसभेला अचानक भेट दिली होती. यावेळी त्यांनी कामाच्या प्रगतीचा आढावा घेतल्याचेही यावेळी संबंधित अधिकाऱ्याने स्पष्ट केले. संसदेच्या नवीन इमारतीच्या उद्घाटनाचा दिवस सरकार ठरवणार आहे. यावेळी सजावटीसाठी फुलांची बोली लावणार्‍या कंत्राटदाराला तीन दिवसात व्यवस्था करावी लागणार असल्याची माहितीही या अधिकाऱ्याने दिली आहे.
नवीन संसद भवनाचे काम जवळपास पूर्ण :नवीन संसद भवनाचे काम जवळपास पूर्ण झाले आहे. संसद भवनाच्या कामांचा जोरदार आढावा घेतला जात असल्याची माहिती या अधिकाऱ्याने दिली आहे. गृहनिर्माण आणि शहरी व्यवहार मंत्रालयाचे सचिव मनोज जोशी, सीपीडब्ल्यूडीचे महासंचालक शैलेंद्र शर्मा आणि इतर अनेक वरिष्ठ अधिकारी वैयक्तिकरित्या कामाच्या प्रगतीवर लक्ष ठेवून असल्याचेही या अधिकाऱ्याने यावेळी सांगितले. नवीन संसद भवन सेंट्रल व्हिस्टाच्या पुनर्विकासाचा एक भाग आहे. राष्ट्रपती भवन ते इंडिया गेटपर्यंतच्या तीन किमीच्या राजपथाची पुनर्रचना करणे, एक समान केंद्रीय सचिवालय बांधणे, पंतप्रधानांचे नवीन कार्यालय आणि निवासस्थान आणि नवीन उपाध्यक्ष एन्क्लेव्ह हे सार्वजनिक बांधकाम CPWD राबवत असलेल्या प्रकल्पाचा भाग आहेत. हे काम केंद्रीय गृहनिर्माण आणि शहरी व्यवहार मंत्रालयाच्या अंतर्गत येते.
पंतप्रधान नरेंद्र मोदींनी केली होती पायाभरणी :दोन वर्षांपूर्वी नवीन संसद भवनाच्या बांधकामाला सुरुवात झाली होती. प्रकल्प पूर्ण करण्याची मूळ मुदत गेल्या वर्षी नोव्हेंबर होती. केंद्रीय गृहनिर्माण आणि शहरी व्यवहार मंत्री हरदीप सिंग पुरी यांनी गेल्या वर्षी नोव्हेंबरमध्ये इमारतीच्या उद्घाटनाची तारीख निवडणे हे सरकारवर अवलंबून असल्याचे स्पष्ट केले होते. डिसेंबर 2020 मध्ये पंतप्रधान नरेंद्र मोदी यांनी आधुनिक सुविधांनी युक्त असलेल्या नवीन संसद भवनाची पायाभरणी केली होती. आता मात्र मे महिन्यात या नवीन संसद भवनाचे उद्घाटन करण्यात येणार असल्याची माहिती देण्यात आली आहे.
हेही वाचा - Umesh Pal Murder Case : गुड्डू मुस्लिम आता दिल्ली पोलिसांच्या रडारवर; घरावर चालणार बुलडोजर
