बघा VIDEO, वॉर्डबॉयने काढला ऑक्सिजन सिलिंडर, कोरोना रुग्णाचा तडफडून मृत्यू

पिछोर जिल्ह्यातील दुर्गापूरचे रहिवासी सुरेंद्र शर्मा यांना कोरोनाची लागण झाल्यामुळे दोन दिवसांपूर्वी या रुग्णालयात दाखल करण्यात आले होते. बुधवारी सकाळी सव्वाआठच्या सुमारास त्यांचा मृत्यू झाला. सीसीटीव्ही तपासले असता, वॉर्डबॉयने सुरेंद्र यांचा ऑक्सिजन सिलेंडर काढून दुसऱ्या रुग्णाला लावल्याचे स्पष्टपणे दिसून आले.

भोपाळ : मध्य प्रदेशच्या शिवपुरी जिल्हा रुग्णालयात एक धक्कादायक प्रकार समोर आला आहे. रुग्णालयातील एका रुग्णाला दिला जात असलेला ऑक्सिजन काढून दुसरीकडे नेल्यामुळे त्या रुग्माचा मृत्यू झाला. याबाबत रुग्णालयाच्या अधीक्षकांना जाब विचारला असता त्यांनी ऑक्सिजन काढल्याच्या गोष्टीचे खंडन केले. मात्र, सीसीटीव्हीमध्ये वॉर्डबॉय ऑक्सिजन काढताना दिसून आल्याचे लक्षात येताच, त्या रुग्णाला ऑक्सिजनची आवश्यकता नव्हती असे अधीक्षकांनी म्हटले.

वॉर्डबॉयने ऑक्सिजन हटवल्याचे सीसीव्हीत समोर..

पिछोर जिल्ह्यातील दुर्गापूरचे रहिवासी सुरेंद्र शर्मा यांना कोरोनाची लागण झाल्यामुळे दोन दिवसांपूर्वी या रुग्णालयात दाखल करण्यात आले होते. बुधवारी सकाळी सव्वाआठच्या सुमारास त्यांचा मृत्यू झाला. यावेळी त्यांचा ऑक्सिजन काढल्यामुळे मृत्यू झाल्याचा आरोप कुटुंबीयांनी केला. मात्र, रुग्णालय प्रशासनाने अगोदर ऑक्सिजन काढला नसल्याचे म्हणत सुरेंद्र यांच्या मृत्यूसाठी दुसरी कारणे पुढे केली. यानंतर कुटुंबीयांनी गदारोळ करत सीसीटीव्ही फुटेज तपासण्याची मागणी केली. यानंतर सीसीटीव्ही तपासले असता, वॉर्डबॉयने सुरेंद्र यांचा ऑक्सिजन सिलेंडर काढून दुसऱ्या रुग्णाला लावल्याचे स्पष्टपणे दिसून आले. यानंतरच त्यांचा तडफडून मृत्यू झाला.

रुग्णाला ऑक्सिजनची गरजच नव्हती; अधीक्षकांची सारवासारव..

यानंतर ऑक्सिजन काढल्याबाबत जाब विचारला असता, त्या रुग्णाला अतिरिक्त ऑक्सिजनची गरजच नव्हती अशी सारवासारव करण्याचा प्रयत्न रुग्णालयाच्या अधीक्षकांनी केला. त्यामुळेच त्या रुग्णाचा ऑक्सिजन सिलिंडर दुसऱ्या रुग्णाला लावल्याचे त्यांनी सांगितले. मात्र, जर या रुग्णाला गरज नव्हती, तर आधी सिलिंडर काढला नसल्याचे का सांगितले? तसेच, सुरेंद्र यांचा अचानक कसा मृत्यू झाला हे प्रश्न कुटुंबीयांनी उपस्थित केले. यानंतर अखेर जिल्हा वैद्यकीय महाविद्यालयाचे अधिष्ठाता अक्षय निगम यांनी या संपूर्ण प्रकरणाचा तपास करण्यासाठी एक समिती स्थापन करण्याचे आदेश दिले आहेत.

तपासाचे आदेश..

रात्रीपासून कोणीही रुग्णाकडे लक्ष दिले नाही..

सुरेंद्र यांच्या कुटुंबीयांनी आरोप केला आहे, की मंगळवारी रात्री ११ वाजेपासून बुधवारी सकाळीपर्यंत एकही नर्स किंवा डॉक्टर या रुग्णाकडे फिरकलाही नाही. ऑक्सिजन काढल्यानंतर सुरेंद्र आपल्या बेडवर तडफडत होते. श्वास घेण्यास अडचण येत असल्यामुळे ते कधी डोकं आपटत, तर कधी गुडघ्यांमध्ये डोकं घालून बसत होते. सुरेंद्र शर्मा यांच्यासोबत त्यांचा मुलगा होता. मात्र, तोदेखील मंगळवारी रात्री घरी गेला होता. त्यानंतरच वॉर्डबॉयने सुरेंद्र यांचा ऑक्सिजन काढला. दुसऱ्या दिवशी सकाळी जेव्हा त्यांचा मुलगा आला, तेव्हा आपल्या वडिलांची अवस्था पाहून त्याने ड्यूटी डॉक्टरांना बोलावले, मात्र त्यांनीदेखील ही बाब गांभिर्याने घेतली नाही. त्यांच्या मुलाने मग स्वतःच्या पाठीवर त्यांना उचलून आयसीयूमध्ये नेण्याचा प्रयत्न केला. मात्र, त्याचे सर्व प्रयत्न व्यर्थ ठरले.

राजकीय संबंधांमुळे मिळाले सीसीटीव्ही फुटेज..

सुरेंद्र शर्मा हे भाजपा प्रदेश कार्यसमिती सदस्य धैर्यवान शर्मा यांचे मामा होते. त्यांच्या मृत्यूबाबत माहिती मिळताच ते जिल्हा रुग्णालयात पोहोचले, ज्यामुळे सुरेंद्र यांच्या कुटुंबीयांना सीसीटीव्ही फुटेज मिळून सत्य समोर आले. मात्र ज्या रुग्णांचे असे राजकीय संबंध नाहीत, अशा कित्येक रुग्णांचे मृत्यू रुग्णालयाच्या ढिसाळ कारभारामुळे झाले असतील हे प्रशासनच जाणे. सुरेंद्र यांना वेळीच ऑक्सिजन मिळाला असता, तर त्यांचा जीव वाचला असता. मात्र, तसे झाले नाही.

याबाबत अधिक तपास सुरू असून, सीएमएचओ अर्जुल लाल शर्मा यांनी चौकशीचे आदेश दिले आहेत.

हेही वाचा :ऑक्सिजनबाबत केंद्राचा मोठा निर्णय; देशातील १०० रुग्णालयांना मिळणार स्वतःचा प्लांट