मुरैना(मध्य प्रदेश) : मध्य प्रदेश रेल्वे विभागाचा एक अजब कारनामा समोर आला आहे. विभागाने चक्क बजरंग बलीलाच नोटीस बजावली आहे! आश्‍चर्याची बाब म्हणजे, या नोटीसमध्ये रेल्वेने बजरंग बलीने अतिक्रमण केल्याचे सांगत 15 दिवसांत अतिक्रमण काढण्यास सांगितले आहे. अतिक्रमण न हटविल्यास रेल्वे कारवाई करेल आणि जेसीबीचा खर्च बजरंग बलीकडून वसूल केला जाईल, असा इशाराही रेल्वेकडून देण्यात आला आहे.
मंदिर रेल्वेच्या जमिनीवर : ग्वाल्हेर-श्योपूर ब्रॉडगेज लाइनचे काम सुरू आहे. मुरैना जिल्ह्यातील सबलगड तहसीलमध्ये ब्रॉडगेज लाइनच्या मध्यभागी हनुमानाचे मंदिर आहे. हे मंदिर रेल्वेच्या जमिनीवर असल्याचे सांगितले जात आहे. त्यामुळेच रेल्वे विभागाने बजरंग बलीला ही अजब नोटीस बजावली आहे. या नोटीसमध्ये बजरंग बलीने रेल्वेच्या जमिनीवर अतिक्रमण केल्याचे रेल्वे विभागाने लिहिले आहे. सोशल मीडियावर व्हायरल होत असलेल्या रेल्वेच्या या पत्रात सबलगडच्या रेल्वे जमिनीवर अतिक्रमण केल्याचे लिहिले आहे. ही नोटीस दिल्यानंतर 7 दिवसांत रेल्वेच्या जमिनीवर केलेले अतिक्रमण काढून तुम्ही रेल्वेची जमीन रिकामी करा, अन्यथा तुमचे अतिक्रमण काढण्याची कारवाई प्रशासनाकडून केली जाईल, असे नोटीशीत लिहिले आहे. असे केल्यास नुकसानीची आणि खर्चाची जबाबदारी तुमची असेल असेही या नोटीशीत म्हटले आहे. बजरंग बलीला दिलेल्या या नोटीसची प्रत सहाय्यक विभागीय अभियंता ग्वाल्हेर आणि जीआरपी स्टेशन प्रभारी ग्वाल्हेर यांनाही पाठवण्यात आली आहे.