भाजप ज्याला 'गुपकर गँग' म्हणते, तो काश्मीरमधील काही स्थानिक पक्षांचा एकत्रित आलेला समूह आहे. ही आघाडी प्रामुख्याने काश्मीरमधील कलम ३७० हटवण्याच्या निर्णय़ाविरोधात लढत आहे. एक लक्ष्य असल्यामुळे, आपापसातील इतर मतभेद विसरुन या आघाडीमध्ये जवळपास सर्व स्थानिक पक्ष एकत्र आले आहेत.
गुपकर आघाडीमधील काही प्रमुख पक्षांनी यापूर्वी भाजपसोबत युती केली आहे. मात्र तेव्हा काश्मीरचा विशेष दर्जा काढून घेण्यात आला नव्हता. फारुख अब्दुल्लांचा नॅशनल कॉन्फरन्स हा पक्ष वाजपेयी काळात एनडीएमध्ये होता. तर, मोदींच्या काळात महबूबा मुफ्तींचा पीडीपी पक्ष एनडीमध्ये सहभागी झाला होता. या दोन्ही पक्षांनी एकमेकांना हरवण्यासाठी भाजपची मदत घेतली, आणि भाजपने या दोन्ही पक्षांच्या मदतीने काश्मीरमध्ये आपले हातपाय पसरले. त्यामुळे आता आपले अस्तित्व टिकवण्यासाठी आपापसातील मतभेद मिटवून हे दोन्ही पक्ष भाजपविरोधात एकत्रितपणे उभे आहेत.
जम्मू-काश्मीरमधील प्रमुख नेत्यांना नजरकैदेत ठेवत कलम ३७० हटवल्यानंतर भाजपसाठी काश्मीरमध्ये सर्व काही ठीकठाक होते. केंद्राचे आदेश मानत, त्यांनी दिलेल्या इशाऱ्यांवर काम करणारे मनोज सिन्हा हे या प्रांताचे राज्यपाल झाले. उमर आणि फारुख अब्दुल्लांच्या सुटकेनंतर इथल्या लोकांची सर्वात मोठी मागणी फोर-जी इंटरनेट सुरू करणे ही होती. त्याव्यतिरिक्त सामन्यांच्या आयुष्यात जास्त काही बदल झाला नाही.