नवी दिल्ली : पंजाब नॅशनल बँक घोटाळ्यातील आरोपी आणि फरार हिरे व्यापारी मेहुल चोक्सी बेपत्ता झाल्याचे सांगण्यात येत आहे. अँटिग्वा अँड बारबुडा देशातून तो बेपत्ता झाला असून, पोलीस रविवारपासून त्याचा शोध घेत असल्याचे समोर आले आहे.
या देशातील स्थानिक मीडिया 'अँटिग्वा न्यूज रुम'ने पोलीस आयुक्त अ‌ॅटली रॉडने यांच्या हवाल्याने याबाबतचे वृत्त दिले. या वृत्तामध्ये असे सांगितले आहे, की भारतीय पोलीस रविवारपासून त्याचा शोध घेत आहेत. त्यामुळे तो सध्या बेपत्ता असल्याचा अंदाज बांधण्यात येत आहे.
आधीच घेतले कॅरेबियन बेटांवरील देशाचे नागरिकत्व..
२०१८मध्ये भारतातून फरार होण्यापूर्वीच २०१७मध्ये चोक्सीने कॅरेबियन बेटांवरील अँटिग्वा अँड बारबुडा देशाचे नागरिकत्व घेतले होते. रविवारी तो देशाच्या दक्षिण भागात गाडी चालवताना दिसून आला होता. त्यानंतर त्याची गाडी आढळून आली, मात्र तो कुठे आहे याची माहिती मिळाली नाही. चोक्सीच्या वकिलांना याबाबत विचारणा केली असता त्यांनीही काही माहिती देण्यास नकार दिला.