Wrestlers Protest : शेतकऱ्यांचा सरकारला अल्टिमेटम, 11 मे पर्यंत न्याय मिळाला नाही तर..

कुस्ती महासंघाचे अध्यक्ष ब्रिजभूषण शरण सिंह यांच्या विरोधात कुस्तीपटूंचे आंदोलन अजूनही सुरूच आहे. आता अनेक राज्यांतील शेतकरी संघटना या आंदोलनाला पाठिंबा देण्यासाठी जंतरमंतरवर पोहोचल्या आहेत. या दरम्यान हरियाणाचे खाप पंचायत सदस्य सुरेंद्र कोच यांनी सरकारला 11 मे पर्यंतचा अल्टिमेटम दिला आहे. मुलींना न्याय न मिळाल्यास 16 मे रोजी संपूर्ण दिल्लीत चक्का जाम करण्यात येणार आहे.

नवी दिल्ली :दिल्लीच्या जंतरमंतरवर आज १५ व्या दिवशीही कुस्तीपटूंचे प्रदर्शन सुरूच आहे. त्याचबरोबर अनेक राज्यातील शेतकरी संघटनाही या पैलवानांच्या समर्थनार्थ पोहोचल्या आहेत आणि महापंचायती घेत आहेत. पंजाब, हरियाणा, उत्तर प्रदेश, राजस्थानच्या खाप पंचायतींशी संबंधित अनेक संघटनांचे सदस्य सकाळपासूनच जंतरमंतरवर पोहोचत आहेत. शेतकरी नेते राकेश टिकैत हेही जंतरमंतरवर पोहोचले आहेत. पंजाबमधील शेतकरी संघटनांमध्ये बहुतांश महिलांचा सहभाग आहे. त्याचबरोबर आंदोलन करणाऱ्या पैलवानांना 11 मे पर्यंत न्याय मिळाला नाही तर 16 मे रोजी संपूर्ण दिल्ली बंद करू, अशी घोषणा शेतकऱ्यांनी केली आहे.

'11 मे पर्यंत पैलवानांच्या मागण्या पूर्ण करा' : हरियाणाचे खाप पंचायत सदस्य सुरेंद्र कोच यांनी जंतरमंतरवर मोठी घोषणा केली आहे. ते म्हणाले की, सर्व खाप पंचायतींच्या चर्चेनंतर एकतर 11 मे पर्यंत पैलवानांना न्याय मिळावा, अन्यथा सरकारने चक्का जामसाठी सज्ज राहावे, असा निर्णय घेण्यात आला आहे. 11 मे पर्यंत पैलवानांच्या मागण्या पूर्ण न झाल्यास हरियाणातील जनता दिल्लीच्या सर्व सीमांवर पोहोचेल, असे ते म्हणाले. राजस्थानचे लोक मथुरा रोडने दिल्लीला जातील आणि पंजाबचे शेतकरी टिकरी, सिंधू सीमेवर पोहोचतील. उत्तर प्रदेशच्या खाप पंचायतीशी संबंधित लोक गाझीपूर सीमा रोखतील.

'नाहीतर दिल्ली बंद करू' :आज देशातील विविध राज्यांतील शेतकरी संघटना, महिला संघटना, कामगार संघटना, सामाजिक कार्यकर्ते जंतरमंतरवर पोहोचले आणि त्यांनी कुस्तीपटूंना पाठिंबा दिला. सर्व संघटनांची मोठी महापंचायत होत असून, त्यात पुढील रणनीती ठरवली जात आहे. जंतरमंतरवर कुस्तीपटूंना संबोधित करताना खाप पंचायतीच्या लोकांनी घोषणा केली की, 11 मेपर्यंत आमच्या मुलींना न्याय मिळाला नाही तर 16 मे रोजी संपूर्ण दिल्ली बंद करू.

सीमेवरच तळ ठोकून बसणार शेतकरी : या दरम्यान खाप पंचायतीने 11 मेपर्यंत वाट पाहत असल्याचेही जाहीर केले. जोपर्यंत बहिणी-मुलींना न्याय मिळत नाही, तोपर्यंत हरियाणा, उत्तर प्रदेश, पंजाब आणि राजस्थानच्या खाप पंचायतींशी संबंधित लोक पायी दिल्लीकडे कूच करतील. पोलिसांनी त्यांना आत जाऊ दिले तर ठीक, नाहीतर सीमेवरच तळ ठोकला जाईल. साक्षी, विनेश आणि बजरंग या तिन्ही पैलवानांचे म्हणणे आहे की, जर आम्हाला न्याय मिळाला तर मग आम्ही आंदोलन करणार नाही. आम्हाला न्याय मिळाला नाही तर पुन्हा एकदा दिल्लीची सीमा पूर्णपणे ठप्प करून मोठे आंदोलन उभारले जाईल, ज्यात लाखोंच्या संख्येने लोक खाप पंचायतीपर्यंत पोहोचतील.

हेही वाचा :