Tauktae Cyclone : चक्रीवादळाचा पंतप्रधान नरेंद्र मोदींनी घेतला आढावा

22:16 May 15

आढावा घेण्यासाठी पंतप्रधान मोदींनी घेतली उच्चस्तरीय बैठक; सज्जतेचा आढावा!

पंतप्रधान नरेंद्र मोदींनी घेतला आढावा

नवी दिल्ली - तौक्ते चक्रीवादळाच्या पार्श्वभूमीवर पंतप्रधान नरेंद्र मोदींनी या वादळाला सामोरे जाण्यासाठी संबंधित राज्ये आणि केंद्रीय मंत्रालय व संस्थांच्या सज्जतेचा आढावा घेण्यासाठी उच्चस्तरीय बैठक घेतली.

कॅबिनेट सचिव हे किनारपट्टीतील राज्ये आणि केंद्रीय मंत्रालयं हे संबंधित यंत्रणांच्या मुख्य सचिवांशी सतत संपर्कात राहातील. केंद्रीय गृहमंत्रालय 24 तास परिस्थितीचा आढावा घेत असून, राज्य सरकार, केंद्रशासित प्रदेश आणि संबंधित संस्थांच्या संपर्कात आहे, अशी माहिती पंतप्रधान कार्यालयाकडून देण्यात आली आहे.

19:12 May 15

पोरबंदरमध्ये 18 तारखेला धडकणार तौक्ते चक्रीवादळ

गुजरात -अरबी समुद्रामध्ये सक्रिय असलेले तौक्ते चक्रीवादळ 18 तारखेला गुजरातच्या किनारपट्टीवर आदळेल. पोरबंदरमध्येही 160 ते 170 किमी प्रतितास वेगाने वारे व मुसळधार पावसाचा अंदाज आहे. सतर्क राहण्याचे आदेश नागरिकांना देण्यात आले आहेत.  

17:51 May 15

कर्नाटकातील सोमाश्वारा किनारी लाटांचा जोर वाढला

मंगळुरू(कर्नाटक) - तौक्ते चक्रीवादळामुळे कर्नाटकमधील समुद्र किनारी जोरदार पावसाला सुरुवात झाली आहे. तसेच या जोराच्या पावसामुळे किनारी भागांमध्ये मोठ्या प्रमाणात नुकसान झाले आहे. कर्नाटकामधील सोमाश्वरा समुद्र किनारी लाटांचा जोर वाढला आहे.    

17:08 May 15

असा असेल तौक्ते चक्रीवादळाचा प्रवास

असा असेल तौक्ते चक्रीवादळाचा प्रवास

मुंबई -तौक्ते चक्रीवादळाचा धोका निर्माण झाला आहे. महाराष्ट्रासह केरळ, कर्नाटक, तामिळनाडू आणि गुजरातच्या काही भागांना या चक्रीवादळाचा फटका बसणार आहे.  

17:00 May 15

केरळमधील 9 जिल्ह्यांना रेड अलर्ट जारी

तिरुअनंतपुरम -केरळमध्ये तौक्ते वादळाचा कहर सुरू झाला आहे. त्यामुळे केरळमधील नऊ जिल्ह्यांमध्ये शनिवारी रेड अलर्ट देण्यात आला आहे. यापूर्वी केरळमधील उत्तर पाच जिल्ह्यांमध्ये रेड अलर्ट देण्यात आला आहे. तौक्ते चक्रीवादळाच्या प्रभावामुळे आयएमडीने रेड अलर्ट दिला होता. इडुक्की, एर्नाकुलम, थ्रीसूर, पलक्कड, मलप्पुरम, कोझिकोड, वायनाड, कन्नूर, कासारगोड यां जिल्ह्यांना रेड अलर्ट देण्यात आला आहे. दरम्यान, तिरुअनंतपुरम, कोल्लम, पठाणमथिट्टा, अलाप्पुझा, कोट्टायम या जिल्ह्यांना ऑरेंज अलर्ट देण्यात आला होता.  

15:49 May 15

एनडीआरएफच्या तीन टीम जामनगरला दाखल

भुवनेश्वर - तोक्ते वादळाच्या पार्श्वभूमीवर सी-130 जे हे एअरक्राफ्ट तीन एनडीआरएपच्या टीमला घेऊन भुवनेश्वरवरून जामनगरला रवाना झाले् आहे. यात एनडीआरएफच्या एका टीममध्ये 126 जवान असून, मदतीसाठी लागणारे साहित्य देखील सोबत आहे.  

15:36 May 15

केरळमधील कासारगोड येथे मुसळधार पाऊस

कासारगोड - केरळमधील कासारगोड जिल्ह्यात काल रात्रीपासून सुरू झालेला मुसळधार पाऊस अद्यापही सुरू आहे. चेरंगी किनारपट्टी भागात सतत पाऊस पडत आहे. कासारगोड येथील रहिवासी दुमजली इमारत कोसळली आणि समुद्राच्या भरतीमुळे ती वाहून गेली आहे. घटनेपूर्वी या इमारतीमधील रहिवाशांना बाहेर काढण्यात आले होते. त्यामुळे कोणतीही जीवितहानी झाली नाही.  

15:14 May 15

केरळमधील कासारगोड येथे मुसळधार पाऊस, दुमजली इमारत कोसळली

नवी दिल्ली -  भारताच्या पश्चिम किनारपट्टीवर तौक्ते  वादळाचा धोका वाढू लागला आहे. सध्या हे वादळ लक्षद्वीप बेटांच्या परिसरातून पश्चिम किनारपट्टीच्या दिशेने सरकू लागले आहे. तामिळनाडू आणि केरळ या राज्यांना याचा फटका बसण्याची शक्यता आहे. केंद्रीय जल आयोगाने यासंदर्भात दोन्ही राज्यांसाठी ऑरेंज अ‍ॅलर्ट जारी केला आहे. या दोन्ही राज्यांच्या किनारी भागामध्ये मोठ्या प्रमाणावर पूरस्थिती निर्माण होण्याचा इशारा देण्यात आला आहे.  

शनिवारी सकाळी केरळमधील मनिमला आणि अकानकोविल तर तामिळनाडूमधील कोडईयार या तिन्ही नद्या धोक्याच्या पातळीच्याही वर वाहात आहेत. त्यामुळे केरळ आणि तामिळनाडू या दोन्ही राज्यांनी किनारी भागामध्ये सतर्कतेचा इशारा दिला आहे. किनारी भागातील स्थानिक प्रशासनाला सतर्क आणि तयार राहण्याचे आदेश दिले आहेत.