World with India : ब्रिटनहून ४५० ऑक्सिजन सिलिंडर चेन्नईला दाखल

विशेष म्हणजे, ऑक्सिजन सिलिंडर आणल्यानंतर त्यांच्या कस्टम क्लिअरन्सची प्रक्रिया केवळ १५ मिनिटांमध्ये पार पाडण्यात आली. या सिलिंडरमध्ये प्रत्येकी ४६.६ लिटर मेडिकल ऑक्सिजन आहे. कस्टम विभागाने ट्विट करत याबाबत माहिती दिली.

चेन्नई : कोरोना लाटेच्या दुसऱ्या तडाख्यात भारतातील वैद्यकीय सेवा पुरती विस्कळीत झाली आहे. देशभरात रेमडेसिवीर, कोरोना लस आणि ऑक्सिजनचा मोठ्या प्रमाणात तुटवडा भासत आहे. यातच दिलासादायक बाब म्हणजे जगभरातून भारतासाठी मदत पाठवली जात आहे. आज (शुक्रवार) सकाळी भारतीय वायुदलाच्या एका विमानाने ब्रिटनहून ४५० ऑक्सिजन सिलिंडर आणले आहेत.

कस्टम क्लिअरन्स केवळ १५ मिनिटात..

विशेष म्हणजे, ऑक्सिजन सिलिंडर आणल्यानंतर त्यांच्या कस्टम क्लिअरन्सची प्रक्रिया केवळ १५ मिनिटांमध्ये पार पाडण्यात आली. या सिलिंडरमध्ये प्रत्येकी ४६.६ लिटर मेडिकल ऑक्सिजन आहे. कस्टम विभागाने ट्विट करत याबाबत माहिती दिली.

परराष्ट्र मंत्रालयाने मानले आभार..

परराष्ट्र मंत्रालयाचे प्रवक्ते अरिंदम बागची यांनी या मदतीसाठी ब्रिटनचे आभार मानले आहेत. ब्रिटनने रविवारी भारताला १ हजार व्हेंटिलेटर्स पाठवण्याचीही घोषणा केली होती. तसेच, ब्रिटनमधील एका कंपनीने भारताला पाच हजार ऑक्सिजन सिलिंडर मदत म्हणून देण्याची तयारी दर्शवली आहे. यापूर्वी सोमवारी या कंपनीकडून ९०० ऑक्सिजन सिलिंडरची खेप भारतात दाखल झाली होती.

अमेरिकेहूनही आली मदत..

दरम्यान, शुक्रवारी अमेरिकेहून पाठवण्यात आलेले वैद्यकीय साहित्यही भारतात दाखल झाले. यामध्ये ५४५ ऑक्सिजन कॉन्सेन्ट्रेटर्सचा समावेश आहे. अमेरिकेकडून पाठवण्यात आलेल्या मदतीतील ही पाचवी खेप आहे. यापूर्वी रविवारी अमेरिकेने १.२५ लाख रेमडेसिवीर व्हाईल्स पाठवल्या होत्या. तर, शनिवारी रात्री एक हजार ऑक्सिजन सिलिंडर पाठवण्यात आले होते.

कुवैतहून वैद्यकीय साहित्य पोहोचले..

आज पहाटे कुवैतने मदत म्हणून पाठवलेले वैद्यकीय साहित्यही भारतात पोहोचले. यामध्ये २८२ ऑक्सिजन सिलिंडर, ६० ऑक्सिजन कॉन्सेन्ट्रेटर्स, काही व्हेंटिलेटर्स आणि इतर वैद्यकीय उपकरणांचा समावेश आहे.

हेही वाचा :बिल आणि मेलिंडा गेट्स घेणार घटस्फोट; २७ वर्षांचा होता संसार