बालासोर(ओडिशा) : ओडिशाच्या बालासोर जिल्ह्यातील बहनगा रेल्वे स्थानकाजवळ कोरोमंडल एक्स्प्रेस ट्रेनला अपघात झाला आहे. शोध आणि बचाव कार्यासाठी पथके घटनास्थळी रवाना झाली आहेत. सूत्रांनी दिलेल्या माहितीनुसार मालगाडीने धडक दिल्याने ट्रेनच्या चार बोगी रुळावरून घसरल्याने 132 जखमींना सोरो सीएचसी, गोपालपूर सीएचसी आणि खंटापाडा पीएचसीमध्ये हलविण्यात आले.
अनेकांचा मृत्यू : या तिहेरी रेल्वे अपघातात आतापर्यंत २३३ प्रवाशांचा मृत्यू झाला असल्याची माहिती समोर येत आहे. तसेच जवळपास 170 प्रवासी या अपघातात जखमी झाले आहेत. सध्या घटनास्थळी युद्धपातळीवर बचावकार्य सुरू करण्यात आले आहे. तीन रेल्वेंचा झालेला हा अपघात खूप भयंकर होता. या अपघातानंतर अनेक रेल्वे गाड्या रद्द करण्यात आल्या आहेत. तसेच अनेक गाड्यांचे वेळापत्रक बदलण्यात आले आहे.
अनेकांनी केला शोक व्यक्त - या तिहेरी रेल्वे अपघाताची माहिती खुद्द पंतप्रधान नरेंद्र मोदी यांनी घेतली आहे. तसेच या घटनेवर पंतप्रधान नरेंद्र मोदी, राष्ट्रपती द्रौपदी मुर्मू, काँग्रेस नेते राहुल गांधी, मल्लिकार्जुन खर्गे यांनी ट्विट करत शोक व्यक्त केला आहे. तसेच लगेच मदतकार्य पोहचवण्याचे निर्देशही संबंधित यंत्रणेला दिले आहेत. तर रेल्वेमंत्री अश्विनी वैष्णव सध्या घटनास्थळावर जाऊन पाहणी करणार आहेत.
मुख्यमंत्र्यांचे निर्देश :ओडिशाच्या मुख्यमंत्र्यांनी राज्यमंत्री प्रमिला मल्लिक आणि विशेष मदत आयुक्त (SRC) यांना तातडीने अपघातस्थळी पोहोचण्याचे निर्देश दिले आहेत. माहिती मिळताच स्थानिक पोलीस आणि रेल्वे अधिकारी घटनास्थळी पोहोचले असून स्थानिकांच्या मदतीने बचावकार्य सुरू आहे.जिल्हाधिकारी, बालासोर यांनाही सर्व आवश्यक व्यवस्था करण्यासाठी घटनास्थळी पोहोचण्याचे निर्देश देण्यात आले आहेत. राज्य स्तरावरून अतिरिक्त मदतीची आवश्यकता असल्यास SRC ची मदत घेण्यात येणार आहे.
सर्व रुग्णालये सतर्क :विशेष मदत आयुक्त (SRC) ओडिशा यांच्यासह वरिष्ठ अधिकारी हेमंत शर्मा, बलवंत सिंग, अरविंद अग्रवाल आणि DG अग्निशमन सेवा बहनगा येथे झालेल्या रेल्वे अपघातातील व्यवस्थेचे निरीक्षण करण्यासाठी घटनास्थळी रवाना झाले. बालासोर आणि आसपासची वैद्यकीय महाविद्यालये आणि सर्व रुग्णालये सतर्क ठेवण्यात आली आहेत.