BJP issues whip to Lok Sabha MPs : भाजपच्या सर्व खासदारांना व्हीप जारी.. संसदेत १३ तारखेपर्यंत उपस्थित राहण्याचे निर्देश

संसदेचे अर्थसंकल्पीय अधिवेशन सुरु असताना आता भाजपने लोकसभेच्या सर्व खासदारांना १३ तारखेपर्यंत संसदेत उपस्थित राहण्यासाठी व्हीप बजावला आहे. तीन ओळींचा हा व्हीप आहे.

नवी दिल्ली: भारतीय जनता पक्षाने (भाजप) गुरुवारी सर्व लोकसभा खासदारांना अर्थसंकल्पीय अधिवेशनादरम्यान 13 फेब्रुवारीपर्यंत सभागृहात उपस्थित राहण्याचा तीन ओळींचा व्हिप जारी केला आहे. संसदेतील अर्थसंकल्पीय अधिवेशन 31 जानेवारी रोजी राष्ट्रपती द्रौपदी मुर्मू यांच्या लोकसभा आणि राज्यसभेतील संयुक्त अभिभाषणाने सुरू झाले आहे. अधिवेशनात काही महत्त्वाचे विषय उपस्थित होऊ शकतात म्हणून भाजपने हा व्हीप जारी केल्याचे समजते.

मोदींनी लोकसभेत दिले उत्तर:अदानी एंटरप्रायझेस आणि अदानी समूहाच्या इतर कंपन्यांवरील हिंडेनबर्ग अहवालावर चर्चेची मागणी विरोधी पक्ष सातत्याने करत आहेत. त्यांनी या मुद्द्यावर पंतप्रधानांनी बोलावे अशी मागणी विरोधकांकडून केली जात आहे. पंतप्रधान नरेंद्र मोदी यांनी बुधवारी लोकसभेत धन्यवाद प्रस्तावाला उत्तर देताना सांगितले की, राष्ट्रपतींनी दोन्ही सभागृहांना आपल्या दूरदर्शी भाषणात राष्ट्राला दिशा दिली आणि देशाच्या 'नारी शक्ती'ला प्रेरणा दिली. त्यांनी राष्ट्राच्या 'संकल्प से सिद्धी'ची तपशीलवार ब्लू प्रिंट दिली, असे मोदी म्हणाले.

महत्त्वाच्या निवडी होण्याची शक्यता:अर्थसंकल्पीय अधिवेशनादरम्यान भाजपकडून काही महत्त्वाच्या निवडी केल्या जाऊ शकतात. त्यामुळेच सर्व खासदारांना १३ तारखेपर्यंत संसदेत उपस्थित राहण्यासाठी तीन ओळींचा व्हीप बजावण्यात आला आहे. पुढील काही दिवसांत संसदेत मोठ्या प्रमाणावर हालचाली होण्याची अपेक्षा आहे. पंतप्रधान नरेंद्र मोदी यांनी लोकसभेत राष्ट्रपतींच्या धन्यवादाच्या प्रस्तावादरम्यान केलेल्या भाषणात विरोधकांना योग्य उत्तर दिल्यानंतर भाजपने आज व्हीप जारी केला.

राहुल गांधी असमाधानी:दुसरीकडे काँग्रेसचे नेते राहुल गांधी यांनी मात्र पंतप्रधानांच्या भाषणावर समाधानी नसल्याचे म्हटले आहे. 'मी पंतप्रधानांच्या भाषणावर समाधानी नाही. तथापि, त्यातून सत्य समोर आले आहे. त्यांच्या भाषणात चौकशीबद्दल काहीही नव्हते. हे स्पष्ट आहे की पंतप्रधान त्यांचे संरक्षण करत आहेत (गौतम अदानी ),' असे राहुल गांधी काल म्हणाले. 'पंतप्रधानांनी त्यांच्या भाषणात (त्यांच्या) कोणत्याही प्रश्नांची उत्तरे दिली नाहीत. त्यांना धक्काच बसला. मी कोणतेही कठीण प्रश्न उपस्थित केले नाहीत. ते साधे प्रश्न होते जे त्यांनी टाळले, असे राहुल गांधी म्हणाले.

राज्यसभेत मोदी गरजले:आज राज्यसभेत पंतप्रधान नरेंद्र मोदी यांनी विरोधीपक्षनेते मल्लिकार्जुन खारगे यांनी केलेल्या टीकेवर जोरदार प्रत्त्युत्तर दिले. मोदी म्हणाले की, तुम्ही आज रडत आहात कारण तुम्हाला जनतेने नाकारले आहे. गेल्या तीन चार वर्षांमध्ये ११ कोटी जनतेला पिण्याच्या पाण्याचे कनेक्शन आम्ही दिले आहेत. दुसरीकडे जन धन खात्याच्या योजनेनुसार आम्ही गेल्या ९ वर्षांमध्ये जवळपास ४८ कोटी खाती उघडली असल्याचेही मोदी यावेळी म्हणाले.