नवी दिल्ली :केरळमध्ये होणाऱ्या विधानसभा निवडणुकांसाठी भाजपा आणि काँग्रेसने आपल्या उमेदवारांची यादी जाहीर केली आहे. भाजपा ११५ जागांवर निवडणूक लढवणार असून, काँग्रेसने ८६ जागांवर आपले उमेदवार उभे केले आहेत.
भाजपाचे राष्ट्रीय सरचिटणीस अरुण सिंह यांनी भाजपाच्या ११२ उमेदवारांची यादी आज जाहीर केली. केरळमध्ये भाजपा ११५ जागांवर निवडणूक लढवणार असून, युतीमधील इतर पक्षांसाठी २५ जागा ठेवण्यात आल्या आहेत अशी माहिती सिंह यांनी दिली.
भाजपाचे प्रदेशाध्यक्ष के. सुरेंद्रन हे दोन मतदारसंघांतून निवडणूक लढवणार आहेत. कासारगोडमधील मंजेश्वर आणि पठामथिट्टामधील कोन्नी मतदारसंघांमधून त्यांना तिकीट देण्यात आले आहे. तर नुकतेच भाजपामध्ये दाखल झालेले 'मेट्रोमॅन' ई. श्रीधरण यांना पलक्कडमधून तिकीट मिळाले आहे. माजी प्रदेशाध्यक्ष कुम्मानम राजशेखरन हे नेमोममधून निवडणूक लढवतील. अभिनेते सुरेश गोपी यांना थ्रिस्सूरमधून तिकीट देण्यात आले आहे. अशी माहिती अरुण सिंह यांनी दिली.