नवी दिल्ली - देशभरामध्ये नागरिकत्व सुधारणा कायद्यावरून आंदोलन सुरू आहेत. देशातले अभिनेते, नाटय़कर्मी, कलावंत, क्रिकेटर हे सीएएवर भाष्य करत आहेत. मात्र, भारतीय संघाचा कर्णधार विराट कोहलीने या प्रकरणावर बोलायला नकार दिला आहे. 'सीएए कायद्याविषयी मला पूर्णपणे माहिती नसून मी या विषयावर भाष्य करणं योग्य ठरणार नाही, असे विराट कोहली म्हणाला.
मला या प्रकरणी पुरेशी माहिती नाही. त्यामुळे मी बेजबाबदारपणे या विषयावर भाष्य केलं तर ते योग्य ठरणार नाही. सीएएवर प्रत्येकाचे वेग-वेगळे विचार आहेत. मला हा पूर्ण विषय माहीत करून घेण्याची गरज आहे. यासंबधी अर्थपूर्ण माहिती जाणून घेतल्यावर मी या विषयावर माझे विचार मांडेल. ज्या विषयासंबधी मला पुर्ण माहिती नाही. त्यावर प्रतिक्रिया देऊन मला नवीन वाद निर्माण करायचा नाही, असे सीएएच्या मुद्द्यावर पत्रकारांनी विचारलेल्या प्रश्नाला विराटने उत्तर दिले.
सीएए विरोधात ईशान्य भारतामधील आंदोलनात काही भागांत जाळपोळ झाली. जोपर्यंत नागरिकत्व विधेयक मागे घेतले जात नाही. तोपर्यंत आंदोलन थांबणार नाही, अशी भूमिका आंदोलकांनी घेतली होती. आंदोलनांच्या पार्श्वभूमीवर, गुवाहटीमध्ये रविवारी भारत आणि श्रीलंके दरम्यान सामना होणार आहे. ५ जानेवारीपासून भारत आणि श्रीलंका यांच्यात ३ टी-२० सामन्यांची मालिका खेळवली जाणार आहे. या सामन्यासाठी विशेष सुरक्षाव्यवस्था पुरवण्यात आलेली आहे