जबलपूर- राम मंदिरासंदर्भातला निकाल सर्वोच्च न्यायालयाने 9 नोंव्हेंबरला जाहीर केला आहे. दरम्यान, अयोध्येत राम मंदिर करण्यासाठी एका वृद्ध महिलेने तब्बल 27 वर्ष उपवास केला आहे. उर्मिला चतुर्वेदी असे या 81 वर्षीय वृद्ध महिलेचे नाव असून त्या मध्यप्रदेशातील जबलपूरमध्ये राहतात.
1992 मध्ये जेव्हा बाबरी मशीद पाडल्याची माहिती उर्मिला यांना समजली, तेव्हापासून म्हणजे 1992 ते 2019 पर्यंत उर्मिला यांनी उपवास चालू ठेवला होता. अयोध्येत राम मंदिर बनवण्यासाठी मार्ग जोपर्यंत निघत नाही तोपर्यंत उपवास करण्याचा निर्धार त्यांनी केला होता. त्यानुसार गेले 27 वर्ष उर्मिला या जेवण न करता फक्त फळांवरच आपला दिवस ढकलत होत्या. केलेल्या या व्रतावरुन उर्मिला यांची लोकांनी चेष्टा केली. काहीनी तर तुझ्या उपवासाच्या व्रतामुळे राम मंदिर खरच तयार होणार का? असा प्रश्न विचारत व्रताचा हट्ट सोडण्याचा प्रयत्नही केला. मात्र, उर्मिला यांनी हा उपवास सुरूच ठेवला. अखेर 9 नोव्हेंबरला सर्वोच्च न्यायालयाने अयोध्या प्रकरणी निकाल जाहीर केला असून यात उर्मिला यांची इच्छा अखेर पूर्ण झाली आहे.