सियाचीनमध्ये हिमस्खलन : 18 हजार फूट उंचीवर गस्त घालणारे दोन जवान हुतात्मा

हिमस्खलनात अडकेल्या जवानांना मदत करण्यासाठी हेलिकॉप्टरही पोहोचले होते. आरोग्य पथकाने दुर्घटनेत सापडलेल्या जवानांना वाचविण्यासाठी प्रयत्न केले. मात्र, दुर्घटनेत जवानांना वीरमरण झाले.

जम्मू - सियाचीनमध्ये पंधरा दिवसात दुसऱ्यांदा हिमस्खलनाची दुर्घटना घडली आहे. या दुर्घटनेत दोन जवान हुतात्मा झाले आहेत. हे जवान 18 हजार फुट उंचीवर गस्त घालत होते. जगातील सर्वात अधिक उंचीवर असलेली युद्धभूमी अशी सियाचीनची ओळख आहे.

लडाखमधील सियाचीनमधील हिमनदीरमध्ये 18 हजार फुटांवर जवान शनिवारी सकाळी गस्त घालत होते. त्यावेळी हिमस्खलनाची दुर्घटना घडली होती, असे संरक्षण दलाचे प्रवक्ते राजेश कालिया यांनी सांगितले. हिमस्खलन मदत पथकाने घटनास्थळ शोधून काढत तातडीने सर्व जवानांना तेथून बाहेर काढले. हिमस्खलनात अडकेल्या जवानांना मदत करण्यासाठी हेलिकॉप्टरही पोहोचले होते. आरोग्य पथकाने दुर्घटनेत सापडलेल्या जवानांना वाचविण्यासाठी प्रयत्न केले. मात्र, त्यामध्ये दोन जवान हुतात्मा झाले.

हेही वाचा-सियाचिनमधील शूरवीरांवर मृत्यू बनून कोसळले हिम!

यापूर्वी 18 नोव्हेंबरला दोन जवान आणि दोन हमालांचा उत्तरेकडील सियाचीनमध्ये मृत्यू झाला होता. सियाचीन ग्लेशियर हे 20 हजार फूट उंचीवर आहे. हा भाग म्हणजे जगात सर्वात अधिक उंचीवर सैनिक तैनात असलेला भाग म्हणून ओळखला जातो. निसर्गाच्या अत्यंत प्रतिकूल वातावरणात जवानांना येथे देशसेवेसाठी कर्तव्य बजावे लागते. हिवाळ्यात तापमान घसरत असताना हिमस्खलनाच्या घटना येथे सतत घडत असतात. तर अनेकदा उणे 60 एवढ्या नीचांकी तापमानाची नोंद होते.