नवी दिल्ली - दिवंगत माजी पंतप्रधान राजीव गांधींची आज ७५ वी जयंती आहे. त्यांचा जन्म २० ऑगस्ट १९४४ ला झाला. आज सकाळी काँग्रेसच्या हंगामी अध्यक्ष सोनिया गांधी, माजी पंजप्रधान डॉ. मनमोहन सिंग, प्रियांका गांधी, राहुल गांधी यांनी राजीव गांधींच्या समाधीस्थळी त्यांना आदरांजली वाहिली. पंतप्रधान नरेंद्र मोदींनी ट्विट करत राजीव यांना आदरांजली वाहिली. माजी राष्ट्रपती डॉ. प्रणव मुखर्जी यांनीही समाधीस्थळी राजीव गांधींना अभिवादन केले.
राजीव गांधींच्या जयंतीनिमित्त काँग्रेस पक्षातर्फे आठवडाभर विविध उपक्रम राबवले जाणार आहेत. काँग्रेस नेते राहुल गांधी यांना सर्व कार्यकर्त्यांना याविषयी सूचना दिल्या आहेत. तसेच, राहुल यांनी आपल्या ट्विटर हँडलवरून हा संपूर्ण आठवडा आपल्या वडिलांना समर्पित करत असल्याचे सांगितले आहे.
आपले वडील राजीव यांच्या पंतप्रधान पदाच्या कारकीर्दीत देशाने यशस्वीपणे गाठलेल्या विविध टप्प्यांविषयी माहिती देणारे व्हिडिओ पोस्ट करणार असल्याचे राहुल यांनी ट्विटरवरून सांगितले आहे. काल त्यांनी पहिला व्हिडिओ पोस्ट केला. माहिती तंत्रज्ञानातील क्रांतीविषयी सांगणारा हा व्हिडिओ आहे.