चेन्नई - शहराला पाणीपुरवठा करणारे सर्व स्त्रोत आटले आहेत. शहरात भीषण पाणीटंचाई निर्माण झाली आहे. ही पाणीटंचाई दूर करण्यासाठी वेल्लोर येथून चेन्नईला रेल्वेने पाणीपुरवठा करण्याचा निर्णय तामिळनाडू राज्य सरकारने घेतला होता.
तामिळनाडूचे मुख्यमंत्री ई. पलानीस्वामी यांनी रेल्वेने पाणीपुरवठा करण्यासाठी स्थानिक पातळीवर आवश्यक त्या तयारी पूर्ण करण्यास सांगितले होते. सर्व तयारी केल्यानंतर जोलारपेट येथून चेन्नईला रेल्वेद्वारे पाणीपुरवठा करण्याचा निर्णय घेण्यात आला होता. रेल्वेने पाणीपुरवठा लवकरात लवकर सुरू व्हावा यासाठी मागील २ आठवड्यापासून अधिकाऱ्यांनी दिवस-रात्र मेहनत घेतली होती.