ननकाना देव दरबार गुरुद्वारा हल्ल्याच्या निषेधार्थ दिल्लीत पाकिस्तानी दूतावाराबाहेर आंदोलन

पाकिस्तानमधील शीखांचे पवित्र स्थळ ननकाना देव दरबार गुरुद्वारा येथे काही कट्टरतावाद्यांनी हिंसक आंदोलन केले. या घटनेच्या विरोधात दिल्लीत पाकिस्तानी दूतावासाबाहेर आंदोलन सुरू आहे.

नवी दिल्ली - पाकिस्तानमधील शीखांचे पवित्र स्थळ ननकाना देव दरबार येथे काही कट्टरतावाद्यांनी हिंसक आंदोलन केले. या घटनेच्या विरोधात शीख अकाली दल आणि शीख गुरुद्वारा व्यवस्थापन समितीने पाकिस्तानी दूतावासाबाहेर आंदोलन सुरू केले आहे. या आंदोलनात मोठ्या प्रमाणात शीख बांधवांनी सहभाग घेतला आहे.

ननकाना साहिब या पवित्र स्थळावरील हल्ल्याचा आंदोलक निषेध करत आहेत. आंदोलनाच्या पार्श्वभूमीवर पोलिसांनी सुरक्षा व्यवस्था वाढवली आहे. शुक्रवारी पाकिस्तानातील कट्टरतावाद्यांनी ननकाना साहिब स्थळाचे प्रवेशद्वार तोडण्याचा प्रयत्न केला. तसेच शीख भाविकांवर दगडफेक केली. या हल्ल्याचे नेतृत्व मोहम्मद हसन याने केले असल्याचे डीएसजीएमसी अध्यक्ष मनजिंदर सिंह सिरसा यांनी सांगितले आहे. 'गुरुद्वारावर हल्ला करण्यापूर्वी हसनने एका सभेला संबोधित केले होते. शहरामध्ये एकाही शीख व्यक्तीला राहू देणार नाही. तसेच शहराचे नाव बदलून गुलाम अली मुस्तफा ठेवणार', असे भाषण त्याने सभेत दिले होते.