पणजी - वंदे भारत मोहिमेअंतर्गत परदेशात अडकलेल्या भारतीयांना परत आणण्याचे काम युद्धपातळीवर सुरू आहे. आज गोव्यातील ३३७ समुद्री प्रवाशांना इटलीहून परत आणण्यात आले. बुधवारी सकाळी १६८ नागरिकांना घेऊन एक विमान दाखल झाले, तर दुपारी तीनच्या सुमारास १६९ नागरिकांना घेऊन दुसरे विमान गोव्यात दाखल झाले.
मिळालेल्या माहितीनुसार, एम/एस कोस्टा क्रूज कंपनीमध्ये काम करणारे ४१४ गोवेकर हे इटलीमध्ये अडकले आहेत. या सर्वांना परत आणण्यासाठी केंद्रीय गृहमंत्रालयाकडून परवानगी मिळाल्यानंतर, आज यातील पहिल्या दोन बॅचेस गोव्यात दाखल झाल्या. यावेळी सोशल डिस्टन्सिंग आणि सॅनिटायझेशनबाबत असलेल्या सर्व नियमांचे पालन करण्यात आले. तसेच या सर्व लोकांची कोरोना चाचणी करण्याची प्रक्रियाही सुरू करण्यात येणार असल्याची माहिती गोवा विमानतळाचे संचालक गगन मलिक यांनी दिली आहे.