निवडणूक प्रक्रियेवरील विश्वास अबाधित राखा; राज ठाकरेंचे निवडणूक आयोगाला आवाहन

निवडणूक आयोगाकडून मला शून्य अपेक्षा आहे. कारण त्यांच्याशी बोलताना त्यांच्या चेहऱ्यावर जे काही हावभाव होते त्यावरूनच हे लक्षात येत होते की, त्यांना आमच्या बोलण्यात काहीही स्वारस्य नाही असे राज ठाकरे म्हणाले.

नवी दिल्ली- महाराष्ट्र नवनिर्मान सेनेचे अध्यक्ष राज ठाकरे यांनी आज दिल्लीत जाऊन निवडणूक आयोगाच्या कार्यालयाला भेट दिली. त्यांनी आयोगाचे मुख्य निवडणूक आयुक्त सुनिल अरोरा यांची भेट घेतली. देशातील लोकांचा निवडणूक प्रक्रियेवरील असलेला विश्वास अबाधित राखण्यासाठी प्रयत्न करण्याचे लेखी निवेदन त्यांनी आयोगाला दिले आहे.

निवेदनात राज ठाकरे म्हणाले की, लोकांचा निवडणूक प्रक्रियेवरील विश्वास कमी होऊ लागला आहे. अनेक लोक, संघटना यांनी माझ्याकडे त्यांची अस्वस्थता सांगितली. गेल्या काही निवडणुका ज्याप्रकारे हाताळल्या त्यावर लोक समाधानी नाहीत. ईव्हीएम विषयी लोकांच्या मनात अनेक शंका आहेत. लोकसभा निवडणुकीत देशातील ३७३ मतदारसंघात (६९ टक्के) झालेले मतदान आणि मोजलेले मतदान यात तफावत आढळली आहे. कोणतीही तफावत होऊ नये म्हणून आपण मशीन वापरतो मात्र, या ईव्हीएममध्ये इतकी तफावत कशी आहे? असा प्रश्न त्यांनी केला.

मतदान यंत्रातील तफावत दाखवूनही आयोगाने यावर कोणतीही कारवाई केली नाही, हे अनाकलनीय आणि चक्रावून टाकणारे आहे. तफावतीची आकडेवारी आयोगाच्या संकेतस्थळावर होती मात्र, ती अचानक काढून घेण्यात आली. ती अचानक का काढून टाकली याचे उत्तर आयोगाने अद्याप दिलेले नाही. ह्या प्रकारामुळे लोकांचा निवडणूक प्रक्रियेवर कसा विश्वास बसेल, असा प्रश्न त्यांनी निवेदनातून विचारला आहे.

मशीन पुरवठादार कंपनीकडून निवडणूक आयोगाला पुरवठा केलेले मशीन आणि आयोगाकडे उपलब्ध मशीन यामध्ये मोठी तफावत आहे. याप्रकरणी न्यायालयात याचिका दाखल झाली आहे. बॅलेट व्होटींगवर निवडणूक आयोगाने निवडणुका घ्याव्यात, अशी आमची मागणी होती. मात्र त्यांच्याकडून शून्य अपेक्षा आहेत एक औपचारिकता म्हणून आम्ही त्यांना पत्र दिले आहे. उद्या कोणी हे म्हणायला नको की बॅलेट पेपरची मागणी होती तर राज ठाकरे निवडणूक आयोगाकडे का गेले नाहीत? औपचारिकता असल्याने ही भेट घेतली आहे, असे निवेदनात म्हटले आहे.

मात्र, निवडणूक आयोग आमचे ऐकेल, आमच्या मागणीचा विचार होईल असे वाटत नसल्याचंही त्यांनी स्पष्ट केले. यापुढच्या म्हणजेच महाराष्ट्रात होणाऱ्या विधानसभा निवडणुकीसंदर्भातच मी निवडणूक आयोगाकडे आलो होतो आणि ती निवडणूक बॅलेट पेपरवर घेण्याची मागणी केली असल्याचे राज ठाकरेंनी निवेदनात म्हटले आहे. एकंदरीत त्यांनी निवडणूक प्रक्रियेत मोठा घोळ असल्याचे सांगितले आहे.

निवडणूक आयोगाकडून मला शून्य अपेक्षा आहे. कारण त्यांच्याशी बोलताना त्यांच्या चेहऱ्यावर जे काही हावभाव होते त्यावरूनच हे लक्षात येत होते की, त्यांना आमच्या बोलण्यात काहीही स्वारस्य नाही असेही राज ठाकरे म्हणाले.