'पंतप्रधान मोदी खोटे बोलतात, ममतांच्या काळात 'सीपीएम'सारखाच अत्याचार होतोय'

शेतकऱ्यांसाठी काहीच केले जात नाही. सगळीकडे बेरोजगारी आहे. ममतांनी रोजगार दिला नाही आणि शेतकरी कर्जमाफीही केली नाही, असे राहुल म्हणाले.

कोलकाता -काँग्रेस अध्यक्ष राहुल गांधी यांची आज पश्चिम बंगालच्या मालदा येथे जाहीर सभा झाली. यावेळी राहुल यांनी पंतप्रधान मोदी आणि ममता बॅनर्जींवर हल्लाबोल केला. मोदींनी कुठलेच आश्वासन पूर्ण केले नाही. तसेच एकीकडे मोदी खोटे बोलतात तर दुसरीकडे ममता बॅनर्जी खोटी आश्वासने देतात, अशा शब्दात राहुल यांनी मोदी आणि ममतांवर टीका केली.

बंगालमधील अनेक वर्षे तुम्ही सीपीएमचे सरकार बघितले. त्यांनी खूप काळ महायुतीचे सरकार चालविले. त्यानंतर तुम्ही ममताजींना निवडून दिले. सीपीएमच्या काळात जे अत्याचार होत होते, तेच आता ममता सरकारच्या काळात होत असल्याचे राहुल म्हणाले. संपूर्ण बंगालला केवळ एक व्यक्ती चालवते. काय संपूर्ण प्रदेशाला केवळ एका व्यक्तीला चालवू द्यायला पाहिजे?, असा सवालही राहुल यांनी यावेळी उपस्थित केला. बंगालच्या विकासासाठी काँग्रेसचे सरकार आवश्यक असल्याचेही राहुल म्हणाले.

पंतप्रधान मोदी आणि ममता बॅनर्जी शेतकऱ्यांचे कर्ज माफ करत नाहीत, अशी टीका राहुल यांनी केली. शेतकऱ्यांसाठी काहीच केले जात नाही. सगळीकडे बेरोजगारी आहे. ममतांनी शेतकऱ्यांना रोजगार दिला नाही आणि कर्जमाफीही केली नाही, असे राहुल म्हणाले.

आपले संबंध प्रेमाचे, राजकीय नाही -

आम्ही कमी उत्पन्न असलेल्या लोकांच्या खात्यात सरळ पैसे टाकणार असल्याचा ऐतिहासिक निर्णय घेतला असल्याचेही राहुल यांनी सांगितले. देशात काँग्रेसची सत्ता आल्यानंतर आम्ही सर्व गरजा पूर्ण करू. मी आपली मदत करणार, असेही राहुल म्हणाले. हे जुने नाते आहे, आपले संबंध राजकीय नाहीत, तर प्रेमाचे आहेत, असेही राहुल म्हणाले.