'उत्तर प्रदेशमध्ये अन्यायाचा बोलबाला, मुख्यमंत्र्यांनी राजीनामा द्यावा'

उत्तर प्रदेशातील हाथरस येथील सामूहिक बलात्कार प्रकरणी काँग्रेस नेत्या प्रियांका गांधी यांनी संताप व्यक्त केला असून उत्तर प्रदेशचे मुख्यमंत्री योगी आदित्यनाथ यांच्या राजीनाम्याचीही मागणी केली आहे.

लखनऊ -उत्तर प्रदेशातील हाथरस येथे झालेल्या सामूहिक बलात्कार प्रकरणावर देशभरातून संताप व्यक्त होत असून पीडित तरुणीचा मंगळवारी उपचारादरम्यान मृत्यू झाला. या घटनेबद्दल गावकऱ्यांमध्ये प्रचंड रोष असतानाही त्यांच्या विरोधाला न जुमानता पोलिसांनी पीडितेच्या पार्थिवावर घाईगडबडीत अंत्यसंस्कार केले. याप्रकरणी काँग्रेस नेत्या प्रियांका गांधी यांनी संताप व्यक्त केला असून उत्तर प्रदेशचे मुख्यमंत्री योगी आदित्यनाथ यांच्या राजीनाम्याची मागणी केली आहे.

'रात्री 2.30 वाजता कुटुंबीयांच्या विरोधात जाऊन उत्तर प्रदेश पोलिसांनी पीडितेवर अंत्यसंस्कार केले. ती जिवंत होती. तेव्हा सरकारने तिला सुरक्षा दिली नाही. अधिकार हिसकावून घेतला आणि तिला सन्मानही दिला नाही. घोर अमानुषता, गुन्हेगारी थांबवली नाही. तर गुन्हेगारांसारखा व्यवहार केला. राज्यात न्याय नाही, तर फक्त अन्यायाचा बोलबाला आहे, असे टि्वट प्रियांका गांधी यांनी केले. तसेच त्यांनी मुख्यमंत्री योगी आदित्यनाथ यांच्या राजीनाम्याचीही मागणी केली.

काय आहे प्रकरण?

दिल्लीतील निर्भया घटनेप्रमाणेच उत्तर प्रदेशच्या हाथरसमध्ये एका तरुणीवर सामूहिक अत्याचार झाला होता. पीडित तरुणीवर दिल्लीच्या सफदरगंज रुग्णालयात उपचार सुरू होते. उपचारांदरम्यान तिचा मृत्यू झाला. 14 सप्टेंबरला या तरुणीवर अत्याचार झाले होते. ज्यानंतर आरोपींनी तिला मारुन टाकण्याचा प्रयत्नही केला होता. चार तरुणांनी एका तरूणीवर बलात्कार करुन, तिची जीभ कापली आणि मान मोडल्याचा अत्यंत संतापजनक व अमानुष प्रकार घडला. या अत्याचारानंतर तरुणी बेशुद्ध झाली, ती मेली आहे असे समजून चौघे आरोपी तिला तसेच टाकून निघून गेले.

मात्र, ती बचावली आणि सुरुवातीला उपचारांसाठी अलीगढच्या जे. एन. रुग्णालयात तिला दाखल करण्यात आले. सोमवारी तिची तब्येत खालावल्याने दिल्लीला हलवण्याचा निर्णय घेण्यात आला. त्यानंतर दिल्लीच्या सफदरगंज रुग्णालयात तिची प्रकृती आणखी ढासळली आणि मंगळवारी तिचा मृत्यू झाला.