नवी दिल्ली -बहुप्रतीक्षित करतारपूर कॉरिडॉरचे भारताच्या बाजूचे उद्घाटन पंतप्रधान नरेंद्र मोदींच्या हस्ते ८ नोव्हेंबरला होणार आहे. केंद्रीय मंत्री हरसिम्रत कौर यांनी ट्विट करत ही माहिती दिली. याआधी हरसिम्रत यांनी करतारपूर कॉरिडॉरचे बांधकाम आणि नूतनीकरण ३१ ऑक्टोबरपर्यंत पूर्ण होईल, असे म्हटले होते.
शीख धर्मसंस्थापक गुरु नानक देव यांची १२ नोव्हेंबरला ५५० वी जयंती आहे. या दिवशी शीख भाविकांसाठी हा कॉरिडॉर खुला होणार आहे. करतारपूर कॉरिडॉरमुळे भारतीय शीख भाविकांना व्हिसाशिवाय पाकिस्तानातील करतारपूर साहिब गुरुद्वारा येथे जाता येणार आहे. भारत-पाक सीमेपासून पाकमध्ये हे ठिकाण ४ किलोमीटर अंतरावर आहे. या ठिकाणी गुरु नानक देव यांनी जीवनातील शेवटची १८ वर्षे वास्तव्य केले होते. हे ठिकाण पाकमधील नरोवाल जिल्ह्यात रावी नदीच्या काठी वसलेले आहे.
हेही वाचा - आंदोलनकर्त्या कर्मचाऱ्यांना पुन्हा सेवेत रुजू करून घेतले जाणार नाही - केसीआर