जम्मू काश्मीर चकमक : तीन दहशतवाद्यांचा खात्मा, एका जवानाला वीरमरण

या हल्ल्यात आज एका जवानाला वीरमरण आले असून एकूण तीन दहशतवाद्यांना यमसदनी धाडण्यात यश आले आहे.

श्रीनगर -पांथा चौक परिसरामध्ये पोलीस आणि सीआरपीएफच्या संयुक्त शोध पथकावर दहशतवाद्यांनी सकाळी हल्ला केला. या हल्ल्यात एका जवानाला वीरमरण आले असून तीन दहशतवाद्यांना यमसदनी धाडण्यात यश आले आहे. काल (शनिवार) पासून लष्कर आणि दहशतवाद्यांमध्ये चकमक सुरू आहे.

या परिसरात पोलीस आणि सीआरपीएफ पथकाची संयुक्त शोधमोहीम सुरू आहे. दबा धरून बसलेले दहशतवादी या पथकावर हल्ला करत आहेत. जवानांकडूनही त्याला चोख प्रत्युत्तर दिले जात आहे. काश्मीर झोन पोलिसांनी दिलेल्या माहितीनुसार तीन दहशतवाद्यांना ठार करण्यात यश आले असून एक पोलीस अधिकारी एएसआय बाबूराम यांना वीरमरण आले आहे.

दरम्यान, जम्मू काश्मीर पोलीस आणि राष्ट्रीय रायफल्सकडून मागील १८ तासात संयुक्त मोहीम राबवत ८ दहशतवाद्यांचा खात्मा केला आहे. मेजर जनरल ए. सेनगुप्ता यांनी याबाबत माहिती दिली. एका दहशतवाद्याने शरणागती पत्करली असून गुप्त माहितीच्या आधारे अचूक कारवाई करण्यात आल्याचे त्यांनी सांगितले.

शुक्रवारपासून मागील १८ तासांत गुप्त माहितीच्या आधारे दोन वेगवेगळ्या मोहीम राबविण्यात आल्या. यात आम्हाला ८ दहशतवाद्यांना ठार करण्यात यश आले. एका दहशतवाद्याने शरणागती पत्करली आहे, असे मेजर जनरल सेनगुप्ता यांनी पत्रकार परिषदेत सांगितले.