..तर नरेंद्र मोदी नाही, नितीन गडकरी होतील पंतप्रधान - सुब्रमण्यम स्वामी

स्वामींनी मुलाखतीत सांगितले, की भाजपला २३० पेक्षा कमी जागा मिळाल्या तर मोदींना पुन्हा या पंतप्रधान पद मिळणार नसल्याची शक्यता आहे.

नवी दिल्ली - भाजपला पूर्ण बहुमत न मिळाल्यास नितीन गडकरी पंतप्रधान पदाचे दावेदार ठरू शकतात, असे मत पक्षाचे ज्येष्ठ नेते सुब्रमण्यम स्वामी यांनी व्यक्त केले आहे. एका वृत्त संस्थेला दिलेल्या मुलाखतीत स्वामी यांनी हे भाकीत केले. मात्र, निवडणुकांच्या निकालावरच हे अवलंबून असेल, असे ही त्यांनी स्पष्ट केले आहे.

स्वामींनी मुलाखतीत सांगितले की, भाजपला २३० पेक्षा कमी जागा मिळाल्या तर मोदींना पुन्हा पंतप्रधान पद मिळणार नसल्याची शक्यता आहे. जर, भाजपने २३० किंवा २२० जागा जिंकल्या आणि एनडीए पक्षांना ३० जागा मिळाल्या तर हा आकडा केवळ २५० वरच पोहोचेल. त्यानंतर बहुमतासाठी पुन्हा ३० जागा गरजेच्या आहेत, असे स्पष्टीकरणही त्यांनी दिले.

याव्यतिरिक्त भाजपला समर्थन देणाऱ्या इतर पक्षांना मोदी पंतप्रधान म्हणून नको असतील तर, भाजप त्यांना पंतप्रधान पदावर बसवणार नाही. त्यासाठी नितीन गडकरी हे विकल्प असू शकतात, असेही स्वामी यांनी सांगितले. मोदींसारखे नितीन गडकरी सुद्धा चांगले व्यक्ती असल्याचे मत स्वामींनी यावेळी व्यक्त केले.

बहुजन समाज पक्षाच्या अध्यक्षा मायावती यांच्यावरही त्यांनी भाष्य केले. मायावती उत्तर प्रदेशात भाजपच्या विरोधात निवडणूक लढवत आहेत. त्यामुळे त्या सोबत येतील का हे सांगता येत नाही. जर, त्यांनी नेतृत्वात बदल सूचवला तर त्यामुळे भाजपला कोणतीही धोका असणार नाही, असे स्वामी म्हणाले.