भारत सरकारने जारी केला देशाचा नविन नकाशा, नव्या रुपात जम्मू-काश्मीर, लडाख

आज केंद्र सरकारने देशाचा नविन नकाशा जारी केला आहे.

नवी दिल्ली -जम्मू-काश्मीर गुरुवारी ३१ ऑक्टोबरच्या मध्यरात्रीपासून राज्य राहिले नसून त्याचे जम्मू-काश्मीर आणि लडाख अशा दोन केंद्रशासित प्रदेशात विभाजन झाले आहे. त्यानंतर आज केंद्र सरकारने देशाचा नविन नकाशा जारी केला आहे. त्यामध्ये जम्मू-काश्मीर आणि लडाख नविन रुपामध्ये पाहायला मिळत आहेत.

जम्मू-काश्मीर आणि लडाख अशा दोन केंद्रशासित प्रदेशात विभाजन झाल्यामुळे आता भारतात 28 राज्ये आणि 9 केंद्रशासित प्रदेश आहेत. नकाशा नुसार लडाखमध्ये कारगिल आणि लेह जिल्ह्यामध्ये सामिल होणार आहेत. तर जम्मू-काश्मीरमधील उर्वरीत जिल्हे केंद्रशासित प्रदेशाअंतर्गत येणार आहेत.

संसदेत ५ ऑगस्टला जम्मू-काश्मीरला विशेष दर्जा देणारे आर्टिकल ३७० रद्द करण्यात आले होते. याच वेळी जम्मू-काश्मीरचे विभाजन करून जम्मू-काश्मीर आणि लडाख असे विभाजन करण्याचे विधेयकही संमत झाले होते. यानंतर जम्मू-काश्मीरचे अधिकृतरित्या दोन केंद्रशासित प्रदेशांत विभाजन झाले.