नरेंद्र मोदी घेणार ‘प्रधानमंत्री राष्ट्रीय पुरस्कार’ २०२० च्या विजेत्या मुलांची भेट

पंतप्रधान नरेंद्र मोदी शुक्रवारी राष्ट्रीय बाल पुरस्कार २०२० च्या विजेत्या मुलांची भेट घेणार आहेत.

नवी दिल्ली - पंतप्रधान नरेंद्र मोदी शुक्रवारी राष्ट्रीय बाल पुरस्कार २०२० च्या विजेत्या मुलांची भेट घेणार आहेत. यावर्षी वेगवेगळ्या प्रकारात अनेक बालकांना पुरस्कार प्रदान करण्यात आला. त्यामध्ये कला, संस्कृती, नाविन्य, शैक्षणिक, समाजसेवा, खेळ आणि शौर्य या क्षेत्रांचा समावेश आहे.

गेल्यावर्षीपासूनच केंद्रीय महिला व बाल विकास मंत्रालयाने ‘प्रधानमंत्री राष्ट्रीय पुरस्कार’ पुरस्कार सुरु केला. सृजनात्मकता, शौर्य, सामाजिक सेवा, क्रीडा, कला व संस्कृती क्षेत्रांत उल्लेखनीय कार्य करणाऱ्या 49 बालकांना पुरस्काराने सन्मानित करण्यात आले. पुरस्कार प्राप्त सर्व बालकांना यावर्षी राजपथवर होणाऱ्या प्रजासत्ताक दिन पथसंचलनात सहभागी होण्याचा बहुमानही मिळणार आहे.