अतिरिक्त सैन्य तैनात केल्यामुळे नागरिकांमध्ये भीतीचे वातावरण - मेहबुबा मुफ्ती

राज्यात सुरक्षा बलाच्या जवानांच्या कोणतीही कमी नाही. सुरक्षा बलाच्या अतिरिक्त तुकड्यांच्या नियुक्तीमुळे नागरिकांच्या मनात भीतीचे वातावरण पसरले आहे, अशी प्रतिक्रिया मेहबुबा मुफ्ती यांनी दिली आहे.

श्रीनगर - केंद्रीय गृहमंत्रालयाने जम्मू-काश्मीरमध्ये सुरक्षा बलांच्या १०० तुकड्या तैनात करण्याचा निर्णय घेतला आहे. गृहमंत्रालयाच्या या निर्णयावर पीपल्स डेमोक्रेटीक पक्षाच्या अध्यक्ष मेहबुबा मुफ्ती आणि जम्मू-काश्मीर पीपल्स मुव्हमेंटचे अध्यक्ष शाह फैझल यांनी प्रश्न उपस्थित केले आहेत.

मेहबुबा मुफ्तींनी केंद्रीय गृहमंत्रालयाच्या निर्णयावर नाराजी व्यक करताना म्हटले, की सुरक्षा बलाच्या अतिरिक्त तुकड्यांच्या नियुक्तीमुळे नागरिकांच्या मनात भीतीचे वातावरण पसरले आहे. राज्यात सुरक्षा बलाच्या जवानांच्या कोणतीही कमी नाही. जम्मू-काश्मीरची समस्या राजकीय आहे. सैन्याच्या माध्यमातून ही समस्या सुटणार नाही. सरकारला त्यांच्या धोरणावर पुन्हा विचार करण्याची गरज आहे.

शाह फैझल यांनीही सरकारच्या या निर्णयाचा विरोध करताना ट्वीट केले आहे, की सुरक्षा बलाच्या १०० तुकड्या नियुक्त केल्यामुळे चिंता वाटत आहे. याबद्दल कोणालाही माहिती नाही. परंतु, सरकारचा हा निर्णय कलम ३५ ए अनुसार आहे का?

शुक्रवारी गृह मंत्रालयाने जम्मू-काश्मीरमध्ये ५० सीआरपीएफ, १० बीएसएफ, ३० एसएसबी आणि आयटीबीपीच्या १० अतिरिक्त तुकड्यांची नियुक्ती करण्याचा निर्णय घेतला होता. राष्ट्रीय सुरक्षा सल्लागार अजित डोवाल यांनी केलेल्या काश्मीर दौऱ्यानंतर हा निर्णय घेण्यात आला होता.