मलेरियावरील एचसीक्यू औषध कोरोनावर प्रभावी नाही, ऑक्सफर्डमधील संशोधकांचा दावा

एचसीक्यू हे औषध मलेरिया, संधिवात आणि ल्युपस या आजारांवर अनके वर्षांपासून वापरण्यात येत आहे. मात्र, ते कोरोनावर उपचार करण्यासाठी उपयुक्त आहे की नाही, यावर पुरेसा अभ्यास झालेला नाही.

लंडन -हाड्रॉक्सीक्लोरोक्वीन औषध कोरोनाग्रस्त रुग्णांवर कितपत उपयुक्त ठरते यावर इंग्लडमधील ऑक्सफर्ड विद्यापीठातील संशोधकांचा अभ्यास सुरु आहे. अनेक कोरोनाग्रस्तांना हे औषध देण्यात आले होते. मात्र, हाड्रॉक्सीक्लोरोक्वीन हे कोरोना बरा होण्यास मदत करत नसल्यामुळे रुग्णांना औषध देणे थांबविण्यात आले आहे, असे संशोधकांनी सांगितले.

1 हजार 542 रुग्णांवर केलेल्या अभ्यासातून असे दिसून आले की, हाड्रॉक्सीक्लोरोक्वीन औषधामुळे मृत्यूदर कमी होण्यात आणि इतर लक्षणे कमी होण्यात काहीही फरक दिसून आला नाही. 28 दिवसांनंतर ज्यांना एचसीक्यू गोळ्या दिल्या त्यातील 25.7 टक्के रुग्ण दगावले तर एचसीक्यू शिवाय उपचार सुरु असेलल्या रुग्णांपैकी 23.5 टक्केच रुग्ण दगावले. दोन्ही अभ्यासातील फरक हा नगन्य असल्याचे मत संशोधकांनी नोंदविले.

हा अभ्यास प्रकाशित झाला असून लवकरच सविस्तर अहवाल जाहीर करण्यात येणार आहे. एचसीक्यू हे औषध मलेरिया, संधिवात आणि ल्युपस या आजारांवर अनके वर्षांपासून वापरण्यात येत आहे. मात्र, ते कोरोनावर उपचार करण्यासाठी उपयुक्त आहे की नाही, हे माहिती नाही. अमेरिकेचे अध्यक्ष डोनाल्ड ट्रम्प यांनी या औषधाला मोठ्या प्रमाणात प्रसिद्धी दिली, मात्र, या औषधामुळे रुग्णाला हृदय रोग होण्याचीही शक्यता आहे.

नुकतेच अनेक अभ्यासातून दिसून आले आहे की, एचसीक्यू कोरोनाग्रस्तावर उपचार करण्यासाठी प्रभावी ठरत नाही, मात्र, सर्व अभ्यास हे कमकुवत आणि निरिक्षणावर आधारित आहेत. जगातील प्रसिद्ध सायन्स जर्नल लॅन्सेटनेही या औषधावर प्रश्नचिन्ह उपस्थित केले आहे.