नवी दिल्ली - पंतप्रधान नरेंद्र मोदी यांच्या हस्ते अयोध्या येथे राम मंदिराचे भूमिपूजन पार पडले आहे. यावेळी राष्ट्रीय स्वयंसेवक संघाचे सरसंघचालक मोहन भागवत, उत्तर प्रदेशच्या राज्यपाल आनंदीबेन पटेल यांचीही उपस्थिती होती. येणाऱ्या अनेक पिढ्यांना राम मंदिर प्रेरणादायी ठरेल. राम आमच्या मनामनात आहेत, असे यावेळी बोलताना पंतप्रधान मोदी म्हणाले.
लाईव्ह अपडेट्स -
२:०५ -सर्वांच्या अथक प्रयत्नांनी राम मंदिर बनणार आहे. राम आमच्या मनामनात आहेत. श्रीराम आजही आमच्या संस्कृतीचे आधार आहेत, असेही पंतप्रधान यावेळी म्हणाले.
२:०० -राम मंदिर हे आपल्या परंपरेचे आधुनिक प्रतिक बनेल, असेही मोदी म्हणाले. राम मंदिर येणाऱ्या अनेक पिढ्यांना प्रेरणा देत राहील, असेही मोदी म्हणाले.
१:४५ -जय सियाराम ही घोषणा केवळ अयोध्येत नव्हे तर संपूर्ण जगात निनादली पाहिजे, असे यावेळी बोलताना पंतप्रधान मोदी म्हणाले. मी याप्रसंगी सर्व श्रीराम भक्तांना मनापासून शुभेच्छा देतो. याप्रसंगी मला निमंत्रण देणे मी भाग्याचे समजतो. आज संपूर्ण देश रामनामाच्या गजरात न्हाऊन निघत आहे, असेही मोदी म्हणाले.
१:३० -राम मंदिर लवकरच उभे राहिल आणि यामुळे समस्त रामभक्तांची जुनी ईच्छा पूर्ण होईल, असे यावेळी बोलताना राम मंदिर न्यास समितीचे अध्यक्ष नित्य गोपाल दास यांनी म्हटले आहे.
१:२० - 'ही नव्या भारताची नवी सुरुवात आहे', असे यावेळी बोलताना सरसंघचालक मोहन भागवत यांनी म्हटले.
१२:५० -उत्तर प्रदेशचे मुख्यमंत्री योगी आदित्यनाथ यांनी केलं संबोधन. शांतता, लोकशाही आणि संवैधानिकपणे कशाप्रकारे विषय हाताळता येतात, हे भारताने संपूर्ण जगाला दाखवून दिले, असे यावेळी बोलताना योगी यांनी सांगितले.
१२:४० -भूमिपूजनाचा कार्यक्रम पंतप्रधान मोदी यांच्या हस्ते पार पडला.