उन्नाव प्रकरण : पीडितेच्या वडिलांच्या मृत्यूप्रकरणी कुलदिप सेंगरसह ७ जण दोषी

पीडितेच्या वडिलांचा तुरुंगात मृत्यू झाला होता. त्यांच्या मृत्यूस सेंगरला आता दोषी धरण्यात आले आहे. बलात्कार प्रकरणी सेंगरला आधीही न्यायालयाने दोषी धरून शिक्षा सुनावली आहे.

नवी दिल्ली - उन्नाव बलात्कार प्रकरणातील पीडितेच्या वडिलांच्या मृत्यू प्रकरणी तीस हजारी न्यायालयाने आज निकाल दिला आहे. बहिष्कृत भाजप आमदार कुलदिप सेंगरसह ७ जण या प्रकरणी दोषी असल्याचे न्यायालयाने शिक्कामोर्तब केले आहे. तर ४ जणांची न्यायालयाने सुटका केली आहे. बलात्कार प्रकरणी न्यायालयाने आधीच कुलदिप सेंगरला शिक्षा सुनावली आहे.

पीडितेच्या वडिलांचा तुरुंगात मृत्यू झाला होता. त्यांच्या मृत्यूस सेंगरला आता दोषी धरण्यात आले आहे. बलात्कार प्रकरणी सेंगरला आधीही न्यायालयाने दोषी धरून शिक्षा सुनावली आहे. या प्रकरणात एकूण ११ आरोपी होते. त्यातील ७ जणांना दोषी ठरवण्यात आले आहे. या प्रकरणी १२ मार्चला न्यायालय शिक्षा सुनावणार आहे.

काय आहे प्रकरण?

उन्नाव पीडितेच्या वडिलांची २०१८ साली एप्रिल महिन्यात तुरुंगात असताना मृत्यू झाला होता. केंद्रीय अन्वेषण विभाग या प्रकरणी तपास करत होता. दोषींमध्ये पोलीस कर्मचाऱ्यांचाही समावेश आहे. नोकरी मागण्यासाठी घरी आलेल्या तरुणीवर कुलदिप सेंगर आणि अन्य सहकाऱ्यांनी सामूहिक बलात्कार केला होता. त्यानंतर पीडितेने या प्रकरणी आमदाराविरोधात तक्रार दाखल केली होती. पीडितेला जीवे मारण्याचा प्रयत्नही करण्यात आला होता. तसेच तिच्या वडिलांचा तुरुंगात असताना मृत्यू झाला होता. हा मृत्यूलाही कुलदिप सेंगर जबाबदार असल्याचे सिद्ध झाले आहे.