केरळ विमान अपघात: 'डिजिटल फ्लाईट डेटा रेकॉर्डर' हस्तगत; दिल्लीत उच्चस्तरीय बैठक

190 प्रवाशांना घेवून दुबईवरून एअर इंडिया एक्सप्रेसचे विमान कोझिकोड विमानतळावर येत होते. मात्र, खाली उतरत असताना विमान धावपट्टीवरून घसरले. अपघातात विमानाचे दोन तुकडे झालेे. शुक्रवारी रात्री 8 च्या दरम्यान हा अपघात झाला.

कोझिकोड - केरळमधील कोझिकोड आंतरराष्ट्रीय विमानतळावर काल(शुक्रवार) रात्री एअर इंडियाच्या विमानाचा लँडिग होता असताना अपघात झाला. या विमानाचा डिजिटल फ्लाईट डेटा रेकॉर्डर (DFDR) हाती लागला आहे. नागरी हवाई उड्डान विभागाच्या महासंचालकांनी याबद्दल माहिती दिली. लँडिंग दरम्यान झालेल्या या अपघातात विमानाचे दोन तुकडे झाले तर दोन पायलटसह 18 जणांचा मृत्यू झाला आहे. दुबईवरून हे विमान येत होते.

यासोबतच ‘कॉकपिट व्हाईस रेकॉर्डर’ मिळवण्यासाठी विमानाचा काही भाग कापण्यात आल्याचे डीजीसीएने सांगितले. नागरी उड्डान महासंचालक, मंत्रालयातील वरिष्ठ अधिकारी, एअरपोर्ट अथॉरिटी ऑफ इंडिया, एअर नेव्हिगेशन सर्व्हीस विभागाचे अधिकारी आज दिल्लीत विमान अपघातासंबंधी बैठक घेणार आहेत. राजीव गांधी भवनमध्ये ही बैठक घेण्याचे नियोजित आहे. आम्ही विमान अपघाताचा तपास सुरु केला आहे. एअरक्राफ्ट अ‌ॅक्सिडेंट इन्व्हेस्टिगेशन ब्युरो((AAIB) चे अधिकारी अपघातस्थळी दाखल झाले आहेत, असे डीजीसीएने सांगितले.

कोझिकोडमधील विमान अपघातग्रस्त आणि त्यांच्या कुटुंबियांसाठी मदत करण्यासाठी दिल्ली आणि मुंबईवरून दोन विशेष विमाने पाठविण्यात आली आहेत. एअर इंडिया एक्सप्रेस विमानाच्या अपघातात दोन पायलटसह 18 जणांचा मृत्यू झाला. मात्र, विमानातील चार कर्मचारी सुरक्षित आहेत. जखमी प्रवाशांना मल्लापुरम आणि कोझिकोड येथील रुग्णालयात दाखल करण्यात आले आहे.

190 प्रवाशांना घेवून दुबईवरून एअर इंडिया एक्सप्रेसचे विमान कोझिकोड विमानतळावर येत होते. मात्र, खाली उतरत असताना विमान धावपट्टीवरून घसरले. अपघातात विमानाचे दोन तुकडे झालेे. शुक्रवारी रात्री 8 च्या दरम्यान हा अपघात झाला. कोरोनामुळे परदेशात अडकलेल्या नागरिकांना भारतात आणण्यासाठी 'वंदे भारत मिशन' अंतर्गत ही विमानसेवा सुरु होती.