महाराष्ट्र अन् गुजरातमधील विविध भागात जोरदार पावसाचा इशारा

येत्या 24 तासांमध्ये दक्षिण अरबी समुद्र आणि लक्षद्विपमध्ये कमी दाबाचे क्षेत्र निर्माण होणार आहे. त्यामुळे मोसमी वाऱ्यांच्या प्रवासाला गती मिळणार आहे.

नवी दिल्ली - येत्या 24 तासांमध्ये दक्षिण अरबी समुद्र आणि लक्षद्वीपमध्ये कमी दाबाचे क्षेत्र निर्माण होणार आहे. त्यामुळे मोसमी वाऱ्यांच्या प्रवासाला गती मिळणार आहे. येत्या 3 जूनपर्यंत महाराष्ट्र व गुजरातमधील विविध भागात चक्रीवादळासह पाऊस पडण्याची शक्यता आहे.

हवामानाची माहिती देणार्‍या विंडी डॉट कॉमच्या मते, गुजरातध्ये चक्रीवादळ येण्याची शक्यता आहे. चक्रीवादळ आले तर ते द्वारकामार्गे कच्छ-कांडलाच्या आसपासच्या भागात जाऊन राजस्थानच्या दिशेने जाईल. चक्रीवादळाच्या शक्यतेमुळे मच्छीमारांना समुद्रात मासेमारीसाठी जाऊ नये, असा इशारा देण्यात आला आहे.

सध्या चक्रीवादळ ओमान-यमेन जवळ केंद्रित आहे. खासगी हवामान निरीक्षक संस्था विंडी डॉट कॉमनुसार अरबी समुद्रात निर्माण झालेले चक्रीवादळ येत्या चार दिवसांत गुजरातच्या दिशेने वाटचाल करेल.

30 मे ते 2 जून दरम्यान दक्षिण द्विपकल्प, भारतातील काही भागांत मुसळधार पाऊस पडेल. केरळ आणि लक्षद्वीप येथे 30 मे ते 1 जून दरम्यान मुसळधार पाऊस पडण्याची शक्यता हवामान खात्याने वर्तवली आहे. तसेच मच्छीमारांना 31 मे ते 4 जून दरम्यान दक्षिण पूर्व आणि पूर्व मध्य अरब समुद्रामध्ये जाऊ नये, असा सल्ला देण्यात आला आहे.