श्रीनगर - जम्मू काश्मीरमधील पुलवामा जिल्ह्यात सुरक्षा दलांसोबत झालेल्या चकमकीत हिजबुल मुजाहिदीन या दहशतवादी संघटनेचा कमांडर आजाद ललहारी ठार झाला आहे. चकमकी दरम्यान दोन जवान जखमी झाले. यातील एका जवानाचा उपचारादरम्यान मृत्यू झाला आहे.
पोलीस, लष्कर आणि सीआरपीएफच्या संयुक्त पथकाने जिल्ह्यातील कमराजीपोरा गावात कारवाई करत दहशतवाद्याला ठार केले. मृत दहशतवादी आझाद ललहारी असल्याची ओळख पटली आहे. पोलीस सुत्रांनुसार, रियाज नाईकू याच्यानंतर ललहारी हिजबुल मुजाहिदीन संघटनेचा कमांडर बनला होता. तसेच तो 'मोस्ट वॉन्टेड' दहशतवाद्यांच्या यादीमध्येही होता. ललहारी याच्या विरोधात ६ गुन्हे दाखल असल्याचे काश्मीरचे पोलीस महासंचालक दिलबाग सिंह यांनी सांगितले.