नवी दिल्ली - केंद्र सरकारने कांदा निर्यातीवर बंदी आणली आहे. देशातील कांद्याच्या वाढत्या दरावर नियंत्रण मिळवणे आणि किरकोळ बाजारातील कांद्याची उपलब्धता वाढण्याचा त्यापाठीमागचा हेतू असल्याचे सांगण्यात येत आहे. परराष्ट्र व्यापार महासंचालनालयाने यासंदर्भात अधिसूचना जारी केली आहे. सर्व प्रकारच्या कांद्याच्या निर्यातीवर त्वरीत बंदी घालण्यात आली आहे.
या अधिसूचनेनुसार सर्व प्रकारच्या कांद्यावर निर्यात बंदी घालण्यात आली आहे. केंद्र सरकारच्या या निर्णयावर शेतकरी नेते राजू शेट्टी यांनी टीका केली आहे. आज कांद्यावर केंद्र सरकारने निर्यात बंदी घातली. काही दिवसांपूर्वी याच केंद्र सरकारकडून कांदा नियंत्रणमुक्त केला व कांदा उत्पादक शेतकऱ्यांना न्याय दिला, असा ढोल वाजविला गेला आणि आता वेळ येताच दलालांना पैसे मिळावेत म्हणून केंद्र सरकारने आज पुन्हा कांदा उत्पादक शेतकऱ्यांविरोधी हा तुघलकी निर्णय घेतला आहे. या बांडगुळांना पोसण्यासाठी शेतकऱ्यांप्रति बेगडी प्रेम दाखवून अजून किती दिवस शेतकऱ्यांचा बळी घेणार आहात? असा प्रश्न त्यांनी केंद्र सरकारला केला आहे.