'घरंतच तुम रव' गाणे गात गोवा पोलिसांचे नागरिकांना घरातच राहण्याचे आवाहन

कोरोनाच्या पार्श्वभूमीवर गोवा पोलीस नागरिकांमध्ये जागरुकता निर्माण करण्याविषयी विविध योजना अंमलात आणत आहे. आधी रस्त्यावर गाणे गाऊन कोरोनाविषयी माहिती दिली होती. तर, आता या घातक आजारापासून बचावासाठी घरीच राहण्याचे महत्त्व सांगण्यासाठी त्यांनी येथील स्थानिक कलाकारांचा समावेश करुन 'घरंतच तुम रव' हा व्हिडिओ तयार केला आहे.

पणजी - कोरोनाचा प्रसार रोखण्याच्या प्रयत्नात गोवा पोलिसांनी विविध सोशल मीडिया प्लॅटफॉर्मवर 'घरंतच तुम रव' (आपण घरातच राहता) हा व्हिडिओ प्रसिद्ध केला आहे. सध्याच्या लॉकडाऊन दरम्यान गोवा पोलिसांनी सोशल मिडीयाद्वारे हा व्हिडिओ प्रसिद्ध करून नागरिकांमधील जनजागृती करण्यासंबंधी भर पाडली आहे.

कोरोनाच्या पार्श्वभूमीवर गोवा पोलीस नागरिकांमध्ये जागरुकता निर्माण करण्याविषयी विविध योजना अंमलात आणत आहे. आधी रस्त्यावर गाणे गाऊन कोरोनाविषयी जागरूकता पसरवली होती. तर, आता या घातक आजारापासून बचावासाठी घरीच राहण्याचे महत्त्व सांगण्यासाठी त्यांनी येथील स्थानिक कलाकारांचा समावेश करून 'घरंतच तुम रव' हा व्हिडिओ तयार केला आहे. याचा अर्थ आपण घरातच रहा, असा होतो.

गोव्याचे पोलीस महानिरीक्षक जसपाल सिंह यांनी बुधवारी सोशल मीडियाच्या विविध प्लॅटफॉर्मवर 'घरंतच तुम रव' (आपण घरातच राहता) हा व्हिडिओ प्रसिद्ध केला. या व्हिडिओमध्ये गाणे पोलीस उपअधीक्षक एडविन कोलाको यांनी लिहिले आणि संगीतबद्ध केले आहे. कोलाको या व्हिडियोविषयी सांगताना म्हणाले, 'लॉकडाऊन कालावधीत हा व्हिडिओ एका घरात शूट करण्यात आला होता. मात्र, यादरम्यान, केंद्रीय आरोग्य आणि कुटुंब कल्याण मंत्रालयाच्या मार्गदर्शक सूचनांचे कुठेही उल्लंघन होणार नाही, याची पुरेपूर खबरदारी क्रू मेंबर्सनी घेतली होती.'

या गाण्यासाठी गायिका सिल्डा परेरा आणि एल्विस मस्करेन्हास यांनी आपला आवाज दिला आहे. तर, अँड्र्यू डिसुझा यांनी या गाण्याचे दिग्दर्शन केले आहे. तर, एल्व्हीस मस्करेन्हास, इलेन पिंटो आणि बालकलाकार सारा परेरा यांनी या व्हिडिओत भूमिका केली आहे. या चित्रपटाची शूटिंग गोव्याचे छायाचित्रकार जोस परेरा यांनी केले आहे.

याबाबत बोलताना आयजी जसपाल सिंह म्हणाले, "कोरोनाबद्दल लोकांमध्ये जागरूकता निर्माण करण्यासाठी आणि त्यांना घरातच रहाण्याचे आवाहन करण्यासाठी आम्ही सोशल मीडिया आणि माहिती-ग्राफिक्सचा मोठ्या प्रमाणात वापर करत आहोत. माहिती व्हिज्युअल प्लॅटफॉर्मवरुन दिली जाते तेव्हा लोकांना अधिक खात्री होते," यासोबतच “गोवा पोलिसांनी नागरिकांची मने वळवून टाकण्याबाबत वापरलेला दृष्टीकोनही लोकांना खूप आवडला आहे. असेही ते म्हणाले.

कोरोना संसर्गाच्या बाबतीत गोव्याची स्थिती देशातील उर्वरित राज्यांच्या तुलनेत बरी आहे. त्याचं श्रेय हे लॉकडाऊन दरम्यान किनारपट्टीवर असलेल्या राज्यात राहणाऱ्या नागरिकांना जाते, जे लॉकडाऊनदरम्यान घरात राहताहेत. यासोबतच, कोरोनाशी दोन हात करताना आरोग्य विभाग आणि पोलीस प्रशासन जे दिवसरात्र एक करून काम करत आहेत, त्यांचे श्रेय सर्वाधिक असल्याचेही ते म्हणाले.