नई दिल्ली - कृषी कायदे मागे घेतले जावेत यासाठी पंजाब आणि हरयाणाच्या शेतकऱ्यांनी दिल्लीच्या सीमेवर येऊन आंदोलन सुरू केले आहे. या आंदोलनाचा आज १७ वा दिवस आहे. सरकार आणि शेतकरी यांच्यात चर्चेच्या सहा फेऱ्या पार पडल्या मात्र त्यातून काहीही तोडगा निघालेला नाही. ८ डिसेंबरला शेतकऱ्यांनी एक दिवसाचा देशव्यापी बंद पुकारला होता. या बंदला देशभरात संमिश्र प्रतिसाद मिळाला. आता शेतकऱ्यांनी दिल्ली-जयपूर राष्ट्रीय महामार्गवरिल वाहतूक ठप्प करण्याचा इशारा दिला आहे. तसेच १४ डिसेंबरला शेतकरी भाजपा मंत्री आणि पार्टीच्या कार्यालयांना घेराव घालणार आहेत.
सरकारने कायद्यात सुधारणा करण्यासंबंधीचा प्रस्ताव शेतकऱ्यांसमोर ठेवला. मात्र शेतकऱ्यांनी हा प्रस्ताव धुडकावत लावत कायदे रद्द करण्याची मागणी लावून धरली. आता शेतकऱ्यांनी आज दिल्ली-आग्रा एक्सप्रेस हायवे बंद करण्याचा मनसुबा जाहीर केला आहे. तसेच हे आंदोलन तीव्र करत १४ डिसेंबरला देशव्यापी आंदोलन करण्याचा इशारा दिला आहे.
शेतकरी नेते शिव कुमार कक्का यांनी सांगितलं की, सरकारने दिलेल्या प्रस्तावामध्ये काही नवीन नाही. यामुळे आम्ही सर्वांनी त्याचा प्रस्ताव स्वीकारला नाही.