नवी दिल्ली - आपल्या 'बाहुबली' पंतप्रधानांनाही कोरोनाशी सामना करता आला नाही, आणि त्यामुळे देश आणखीनच अडचणीत पोहोचला आहे अशी टीका काँग्रेस नेते कपिल सिब्बल यांनी केली आहे. मोदी सरकारच्या दुसऱ्या पर्वाला एक वर्ष पूर्ण झाल्याच्या पार्श्वभूमीवर काल भाजपने आपलीच पाठ थोपटून घेतली होती. त्यानंतर सिब्बल यांनी सरकारवर हा बाण सोडला आहे.
सिब्बल यांनी आरोप केला आहे, की सरकारने एनपीआर, नागरिकत्व सुधारणा कायदा आणि असंविधानिक कृती (प्रतिबंध) कायद्याचा गृहमंत्रालयाने गैरवापर केला आहे. विशेषतः असंविधानिक कृती (प्रतिबंध) कायदा हा केवळ दहशतवादी कृत्यांविरोधी वापरण्यात येणार असल्याची तरतूद असली तरी सरकार मात्र याचा सर्रास कुठेही वापर करताना दिसून येत आहे, असे ते म्हणाले.