केंद्रीय निवडणूक आयुक्त अशोक लवासांचा राजीनामा

देशाचे सध्याचे मुख्य निवडणूक आयुक्त सुनिल अरोरा हे २०२१च्या एप्रिलमध्ये सेवानिवृत्त होतील. त्यानंतर लवासा हे मुख्य निवडणूक आयुक्त होणार होते. मात्र, यापूर्वीच त्यांनी राजीनामा दिला. आपला कार्यकाळ पूर्ण होण्यापूर्वीच राजीनामा देणारे ते दुसरे निवडणूक आयुक्त आहेत.

नवी दिल्ली: निवडणूक आयुक्त अशोक लवासा यांनी आपल्या पदाचा राजीनामा दिला आहे. एक महिन्यापूर्वी त्यांची एशियन डेव्हलपमेंट बँकेच्या (एडीबी) उपाध्यक्ष पदी निवड झाली होती. त्यानंतर, आज (मंगळवार) त्यांनी राष्ट्रपती रामनाथ कोविंद यांच्याकडे आपला राजीनामा सुपूर्द केला. त्यांनी आपल्याला ३१ ऑगस्टला पदमुक्त करावे, अशी मागणी केली असल्याची माहिती सूत्रांनी दिली.

देशाचे सध्याचे मुख्य निवडणूक आयुक्त सुनिल अरोरा हे २०२१च्या एप्रिलमध्ये सेवानिवृत्त होतील. त्यानंतर लवासा हे मुख्य निवडणूक आयुक्त होणार होते. मात्र, यापूर्वीच त्यांनी राजीनामा दिला. आपला कार्यकाळ पूर्ण होण्यापूर्वीच राजीनामा देणारे ते दुसरे निवडणूक आयुक्त आहेत.

अशोक लवासा हे हरियाणा केडरमधील आयएएस अधिकारी (निवृत्त) आहेत. जानेवारी २०१८मध्ये त्यांची निवडणूक आयुक्त म्हणून निवड झाली. त्यापूर्वी, जून २०१६ ते ऑक्टोबर २०१७पर्यंत ते देशाचे अर्थसचिव म्हणून कार्यरत होते. तसेच यापूर्वी त्यांनी देशाचे पर्यावरण सचिव, आणि हवाई उड्डाण सचिव म्हणूनही काम केले आहे.

लवासा यांनी ऑस्ट्रेलियाच्या साऊथर्न क्रॉस विद्यापीठातून एमबीए पदवी प्राप्त केली आहे. तसेच, मद्रास विद्यापीठातून संरक्षण आणि सामरिक अभ्यासातून त्यांनी एमफिल केले आहे.

हेही वाचा :मॉरिशियस : 'ध्रुव'ने तेल गळती झालेल्या जहाजामधून 600 जणांची केली सुटका