'मी दहशतवादी, की तुमचा मुलगा हे दिल्लीकरांनीच ठरवावं'

भाजप खासदार परवेश वर्मा यांनी दिल्लीचे मुख्यमंत्री अरविंद केजरीवाल यांना दहशतवादी म्हटले आहे. त्यावर अरविंद केजरीवाल यांनी पत्रकार परिषद घेऊन आपल्या कामाचा लेखाजोखा मांडला.

नवी दिल्ली -राजधानी दिल्लीत विधानसभा निवडणुकीच्या प्रचाराची रणधुमाळी सुरू आहे. प्रचारादरम्यान नेत्यांकडून एकमेकांवर चिखलफेक केली जात आहे. भाजप खासदार परवेश वर्मा यांनी दिल्लीचे मुख्यमंत्री अरविंद केजरीवाल यांना दहशतवादी म्हटले आहे. त्यावर अरविंद केजरीवाल यांनी पत्रकार परिषद घेऊन आपल्या कामाचा लेखाजोखा मांडला. 'मी दहशतवादी वाटतो, की तुमचा मुलगा हे दिल्लीकरांनीच ठरवावं', असे केजरीवाल म्हणाले.

हुतात्मा जवानांच्या कुटुंबीयांची काळजी घेणारा, शिक्षण आणि आरोग्यासंबधीत उपाययोजना करणारा आणि वृद्धांना तीर्थयात्रेवर पाठवणारा दहशतवादी असतो का, असा सवाल त्यांनी केला. तसेच मी खरगपूर आयआयटी येथून शिक्षण घेतले आहे. मी विदेशातही जाऊ शकलो असतो. मात्र, मी देशाची सेवा करण्याचा निर्णय घेतला आणि देशातील भ्रष्टाचाराविरोधात लढा दिला, असे केजरीवाल म्हणाले.

मला मधुमेह असून मला दिवसातून चारवेळा इन्सुलिन घ्यावे लागते. जीव धोक्यात घालून भ्रष्टाचाराविरोधात दोनदा मी उपोषणाला बसलो. माझ्या विरोधात कारवाया झाल्या, मात्र मी मागे हटलो नाही, असे केजरीवाल म्हणाले.

भाजप खासदार परवेश वर्मा यांनी एका प्रचार सभेला संबोधित करताना केजरीवाल यांना दहशतवादी म्हटले होते. दिल्लीमध्ये केजरीवाल यांच्यासारखे दहशतवादी लपून बसले आहेत, असे शर्मा म्हणाले होते. त्यावर केजरीवाल यांनी बुधवारी टि्वट करून दु:ख व्यक्त केले होते.

हेही वाचा -दिल्ली निवडणूक : अनुराग ठाकूर यांच्यावर 72 तासांसाठी प्रचार बंदी, निवडणूक आयोगाची कारवाई