केरळात मुसळधार पावसाचे 60 बळी, राहुल गांधींनी घेतली पुरग्रस्तांची भेट

माजी काँग्रेस अध्यक्ष राहुल गांधी आज केरळला गेले असून मतदारक्षेत्र वायनाडला भेट दिली आहे.

तिरुवनंतपुरम - केरळात मुसळधार पावसाचा कहर सुरूच आहे. माजी काँग्रेस अध्यक्ष राहुल गांधी आज केरळला गेले असून मतदारक्षेत्र वायनाडला भेट दिली आहे. वायनाडला पुराचा सर्वात जास्त फटका बसला आहे.

वायनाडचा दौरा करणार असल्याची माहिती राहुल गांधींनी टि्वटरवरून दिली होती. 'पुढचे काही दिवस मी माझ्या लोकसभा मतदार संघ, वायनाड येथे राहणार आहे. यादरम्यान मी वायनाडमधील मदत-शिबिरांना भेट देईन. जिल्हा व राज्य अधिकाऱ्यांसमवेत वायनाडमधील स्थितीचा आढावा घेईन', असे राहुल यांनी टि्वट करून म्हटले.

यापुर्वी राहुल यांनी पंतप्रधान नरेंद्र मोदींना फोन करुन वायनाडमधील लोकांना मदत करण्याची विनंती केली होती. याचबरोबर मुख्यमंत्री पिनारयी विजयन आणि जिल्हाधिकाऱ्य़ांशी चर्चा केली होती. तर पूरग्रस्त भागांमध्ये जाऊन गरजू लोकांची मदत करा असे आवाहन कार्यकर्त्यांना केले होते.

केरळमध्ये पूर आणि भूस्खलन व पावसाशी संबंधित दुर्घटनांत आतापर्यंत 60 जणांचा मृत्यू झाला आहे. तर एक लाखापेक्षा अधिक लोकांना सुरक्षितपणे शिबिरात स्थलांतरित करण्यात आले आहे.