चंदीगढ - उत्तर प्रदेशच्या धर्तीवर हरियाणा सरकारनेही आता लव्ह जिहाद विरोधात कायदा करण्याचे संकेत दिले आहेत. काही दिवसांपूर्वी हरियाणाच्या फरीदाबादमध्ये एका मुलीची, लग्नाला नकार दिल्याने हत्या करण्यात आली होती. हे प्रकरण चांगलेच तापले असून, लव्ह जिहादचा आरोप करत संपूर्ण देशामध्ये या घटनेविरोधात आंदोलन सुरू आहे. यापूर्वीच योगी सरकारने आपण लव्ह जिहाद विरोधात कायदा तयार करणार असल्याचे सांगितले आहे.
हरियाणामध्ये लव जिहाद विरोधी कायद्याची गरज - खट्टर
हरियाणाचे गृहमंत्री अनिल विज यांनी उत्तर प्रदेशचे मुख्यमंत्री योगी आदित्यनाथ यांच्या निर्णयाचे समर्थन केले आहे. त्याच धर्तीवर आपण देखील लव्ह जिहाद विरोधात कडक कायदा करणार असल्याचे म्हटले होते. आता मुख्यमंत्री मनोहरलाल खट्टर यांनी देखील लव्ह जिहाद विरोधात कायदा करण्याचा विचार सुरू असल्याचे सांगितले आहे.