अर्थव्यवस्था उद्ध्वस्त करून यांचे तोंड बंदच - प्रियांका गांधी

मोदी सरकारच्या १०० दिवसांच्या कारभारावर काँग्रेसकडून व्हिडिओ बनवण्यात आला आहे. '१००डेज नो विकास' या हॅशटॅगखाली हा व्हिडिओ सोशल मीडियावर व्हायरल करण्यात येत आहे.

नवी दिल्ली- देशभरात सध्या असलेल्या मंदीच्या पार्श्वभूमीवर काँग्रेस महासचिव प्रियांका गांधींनी भाजप सरकारवर जोरदार टीका केली आहे. देशाची अर्थव्यवस्था उद्ध्वस्त करून हे सरकार काही झालेच नाही या अविर्भावात तोंड उघडण्यास तयार नाही, असा घणाघाती आरोप त्यांनी केला आहे.

ट्विटरवरून त्यांनी हिंदी भाषेत कवितेद्वारे सरकारच्या कारभारावर टीका केली आहे. 'अर्थव्यवस्था करके चौपट, मौन बैठी है सरकार, संकट में हैं कम्पनियाँ, ठप्प हो रहा व्यापार, ड्रामे से, छल से, झूठ से, प्रचार से करके कपट, जन-जन से छुपा रहे देश की हालत विकट', अशी कविता त्यांनी केली आहे. देशाची अर्थव्यवस्था उद्ध्वस्त झाली असताना हे सरकार लोकांपासून ही गोष्ट लपवत असल्याचे त्यांनी कवितेतून सांगण्याचा प्रयत्न केला आहे.

मोदी सरकारच्या १०० दिवसांच्या कारभारावर काँग्रेसकडून व्हिडिओ करण्यात आला आहे. '१००डेज नो विकास' या हॅशटॅगखाली हा व्हिडिओ सोशल मीडियावर व्हायरल करण्यात येत आहे. यामध्ये विविध उद्योजक, व्यापारी, दुकानदार, वाहनचालक सध्या धंद्यात कशी वाईट परिस्थिती आहे, हे सांगताना दिसत आहेत.

राहुल गांधींनीही सरकारच्या १०० दिवसांच्या कारभारावर ट्विटरवरून टीका केली आहे. अखंडपणे लोकशाही बुडवण्याचे काम चालू आहे, माध्यमांची गळचेपी सुरू आहे. चांगले नेतृत्व, नियोजन, मार्गदर्शनाचा अभाव असल्याने अर्थव्यवस्था रसातळात जात असल्याचे त्यांनी म्हटले आहे.