नवी दिल्ली - कोरोनावरील लसीचे ४० ते ५० कोटी डोस खरेदी करण्याची भारत सरकारची तयारी सुरू आहे. त्याद्वारे जुलै २०२१ पर्यंत २५ कोटी लोकांपर्यंत कोरोनाची लस पोहचवली जाणार आहे. त्यासाठी मानव संसाधन, प्रशिक्षण, पर्यवेक्षण इत्यादी आघाड्यांवर मोठ्या प्रमाणात काम सुरू असल्याचे आज केंद्रीय आरोग्यमंत्री हर्षवर्धन यांनी सांगितले. साप्ताहिक वेबिनार 'संडे संवाद'मध्ये ते बोलत होते.
नीती आयोगाचे सदस्य व्ही.के. पॉल यांच्या अध्यक्षतेखाली एक उच्चस्तरीय समिती या संपूर्ण प्रक्रियेवर काम करत आहे. लसीची खरेदी आणि डोस देण्याची प्रक्रियेवर संपूर्ण लक्ष ठेवले जाणार आहे. खऱ्या गरजूला लस मिळते की, नाही हे त्यातून लक्षात येईल. देशात सुरू असलेल्या लसींच्या संशोधनांवरही ही समिती देखरेख करत आहे, असे मंत्री म्हणाले.